एस. एम. जोशी कॉलेजमध्ये आयडिया लॅबचे उदघाटन संपन्न

न्यूज पीसीएमसी नेटवर्क

पुणे (दि. १२ जुलै २०१९) :-  एस.एम.जोशी कॉलेज, हडपसर या ठिकाणी आयडिया लॅबचे उदघाटन संपन्न झाले. आजचे युग हे माहिती-तंत्रज्ञानाचे व नाविन्यपूर्ण संशोधनाचे युग आहे. आयडिया लॅबसारख्या ऍपच्या माध्यमातून विद्यार्थ्यांना आपल्या कल्पनांना वास्तव रूप मिळण्याचेव्यासपीठ उपलब्ध झाले आहे. विविध वैज्ञानिक शास्त्रे, कृषी, औषधे, इलेकट्रीक उपकरणे अशा विविध क्षेत्रात आपल्या कल्पनांना मूर्त रूप प्राप्त होऊ शकते. त्यामुळे जास्तीत जास्त विद्यार्थ्यांनी त्याचा लाभ घ्यावा, असे आवाहन कार्यक्रमाचे प्रमुख पाहुणे व उदघाटक वैज्ञानिक डॉ. भारत काळे यानी केले.

कार्यक्रमाच्या अध्यक्षस्थानी डॉ. मिलिंद कुलकर्णी होते. संशोधनाची विविध क्षितिजे आजच्या तरुणाईला खुणावत आहेत, अशा वेळी राष्ट्रीय पातळीवर आपल्या विचारांचा ठसा उमटविण्याची संधी उपलब्ध झाली आहे. त्यात त्यांनी स्वतःला झोकून देऊन कार्यक्षमता सिद्ध करावी, असा मनोदय व्यक्त केला. सदर कार्यक्रमास ट्रांसफिनाईट इनोव्हेटिव्ह सोल्युशन्स प्रा. लि. च्या सतीश जावळे, आशुतोष कुलकर्णी, सावित्रीबाई फुले पुणे विद्यापीठ, वनस्पतीशास्त्र विभाग प्रमुख डॉ. ए. बी. आडे यांनी मनोगते व्यक्त केली.

महाविद्यालयाचे प्राचार्य डॉ.अरविंद बुरुंगले यांनी आपल्या मनोगतात रयत शिक्षण संस्थेचे वेगळेपण मांडत आपल्या महाविद्यालयाने कर्मवीरांच्या वसा कसा जपला आहे ते स्पष्ट करीत आयडिया लॅब हे ऍप विद्यार्थ्यांच्या जीवनात नवसंजीवनी ठरणारे आहे, असे प्रतिपादन केले. आनंद सुतार या विद्यार्थ्याने आपली कॅन्सरवरील आयडिया मांडली. उपप्राचार्य डॉ. महादेव जर, डॉ. मनीषा सांगळे यांनी कार्यक्रमाचे संयोजन केले. डॉ.आनंद हिप्परकर यांनी उपस्थितांचे आभार मानले. कार्यक्रमाचे सूत्रसंचालन डॉ. शकुंतला सावंत यांनी केले.