हैदराबाद बलात्कार प्रकरणातील त्या चारही आरोपींचा एन्काउंटर…

न्यूज पीसीएमसी नेटवर्क

पिंपरी (दि. ६ डिसेंबर २०१९) :-  हैदराबाद डॉक्टरवर झालेल्या गँगरेप आणि खूनामुळे देश हादरून गेला होता. देशभर गाजलेल्या निर्भया प्रकरणानंतर हैदराबाद येथे एका डॉक्टर युवतीवर बलात्कार करून तिला जाळण्याचा घटनेने संपूर्ण देशभरात संतापाची लाट उसळली होती. तर हैद्राबाद निर्भया प्रकरणातील नराधमांना फाशी देण्याची मागणी देशभरातून करण्यात येत होती.

हैदराबाद बलात्कार प्रकरणातील ४ आरोपी पोलीस एन्काउंटरमध्ये ठार झाले आहेत. तेलंगाणाचे पोलीस महानिरिक्षक जितेंद्र यांनी ही माहिती दिली आहे. दोन दिवसांपूर्वी कोर्टानं या चारही आरोपींना पोलीस कोठडी सुनावली होती.

हैदराबादपासून ५० किमी अंतरावर असलेल्या चटनपल्ली गावात ही घटना घडली आहे. घटनेच्या दिवशी टोंडुपल्ली टोल प्लाझाजवळ स्कूटी पार्क करून ती टॅक्सीने पुढे गेली. पण ती परतली तेव्हा तिच्या स्कुटीचे टायर पंक्चर झालेले होते. म्हणून मग स्कूटी तिथेच टोल प्लाझाजवळ सोडून टॅक्सीने घरी परतण्याचं तिने ठरवलं. टोल प्लाझाजवळच्या दोन जणांनी पंक्चर काढतो असे सांगत तिची स्कूटी नेली. मृत तरुणीनं आपल्या बहीण आणि भावाला फोनवरून याबाबत सांगितलं होतं. रस्त्यावर एकटं उभं रहायला भीती वाटतेय, अचानक काही लोक दिसू लागले आहेत आणि एक ट्रक आल्याचंही तिने फोनवर बोलताना सांगितलं होतं.

थोड्या वेळात परत फोन करते असं सांगून तिने बहिणीसोबतच संभाषण संपवलं, पण त्यानंतर फोन बंदच झाला. मृत तरुणीच्या कुटुंबाने टोल प्लाझाजवळ तिचा शोध घेतला आणि त्यांनतर शमशाबाद पोलीस ठाण्यात ती बेपत्ता झाल्याची तक्रार दाखल केली. त्यानंतर शमशाबाद पोलीसांच्या शादनगर पोलीस ठाण्याच्या हद्दीत एका बांधकाम सुरू असलेल्या पुलाखाली अर्धवट जळलेला मृतदेह सापडला होता.