गोवर व रूबेला प्रतिबंधक लसीकरणाची मोहिम जास्तीत जास्त नागरिकांपर्यंत पोहचवण्याचे नगरसेवक नाना काटे यांचे आवाहन  

न्यूज पीसीएमसी नेटवर्क

पिंपळे सौदागर (दि. २९ नोव्हें) :- पिंपरी-चिंचवड महानगरपालिकेच्या आरोग्य विभागामार्फत पिंपळे सौदागर येथील अण्णासाहेब मगर विद्यालयात गोवर व रूबेला प्रतिबंधक लसीकरणाची मोहिम राबविण्यात आली होती.

यावेळी नगरसेवक नाना काटे, नगरसेविका शितल नाना काटे यांच्या हस्ते लहान बालकांना लस देऊन लसीकरण मोहिमेचे उदघाटन करण्यात आले. डॉ. शिवाजी ढगे, डॉ. संगीता तीरुमनी, ढोले सिस्टर आदी उपस्थित होते.

यावेळी नाना काटे म्हणाले की, लहान मुलांना रोगप्रतिकार शक्ती कमी असल्याने ती सहजासहजी क्षयरोग, पोलिओ, धनुर्वात, घटसर्प, डांग्या खोकला, गोवर, रूबेला, हिमोफिलीयस एन्फ्लुएंझा ब, मेंदुज्वर, न्युमोनिया आदी आजारांना बळी पडतात. बालवयात होणारे रोग टाळण्याच्या सर्वात प्रभावी मार्गांपैकी एक म्हणजे लसीकरण. कोणत्याही रोग होण्याअगोदर त्यास प्रतिबंध करणे हाच खरा उपाय असतो. याच पार्श्वभूमीवर सार्वत्रिक लसीकरण कार्यक्रमाची अंमलबजावणी सुरू झाली. लसीकरणामुळे टाळता येऊ शकणाऱ्या रोगांना थोपवणे आणि त्यावर नियंत्रण ठेवण्यामध्ये महत्त्वाचे यश मिळाले आहे. त्यामुळे पालकांनी गोवर व रूबेला प्रतिबंधक लसीकरणाची मोहिम जास्तीत जास्त नागरिकांपर्यंत पोहचवावी असे आवाहन नाना काटे यांनी केले आहे.