न्यूज पीसीएमसी नेटवर्क
चिंचवड (दि. १४ डिसें:) :- श्री मोरया गोसावी यांचा ४५७ वा संजीवन समाधी महोत्सव १७ ते २७ डिसेंबर दरम्यान संपन्न होणार आहे. त्यानिमित्त पिंपरी-चिंचवडकरांना अध्यात्मिक आणि सांस्कृतिक कार्यक्रमांची मेजवानी मिळणार असून, सुप्रसिद्ध गायक सलील कुलकर्णी, कवी संदीप खरे, राकेश चौरसिया, शरद पोंक्षे हे महोत्सवाचे आकर्षण असणार आहेत. “आपलं घर पुणे’चे संस्थापक विजय गजानन फळणीकर यांना या वर्षीचा “श्री मोरया जीवन गौरव’ पुरस्कार प्रदान करण्यात येणार असल्याचे चिंचवड देवस्थान ट्रस्टचे मुख्य विश्वस्त मंदार जगन्नाथ देव महाराज यांनी पत्रकार परिषदेत माहिती दिली.
यावेळी विश्वस्त विश्राम देव, आनंद तांबे, अॅड. राजेंद्र उमाप, विनोद पवार, नगरसेविका करूणा चिंचवडे, अश्विनी चिंचवडे, अपर्णा डोके, राजेंद्र गावडे, मोरेश्वर शेडगे आदी उपस्थित होते.
पोलीस आयुक्त आर. के. पद्मनाभन यांच्या हस्ते (दि. १७) रोजी सायंकाळी सहा वाजता महोत्सवाचे उद्घाटन होणार आहे. सोमवारी (दि. २४) सकाळी सहा वाजता मोरया गोसावी यांच्या समाधीची महापूजा चंद्रशेखर रबडे गुरुजी यांच्या हस्ते होईल. सकाळी सात वाजता शालेय विद्यार्थ्यांचे अथर्वशीर्ष पठण, दुपारी दोन वाजता आरोग्य व दंत चिकित्सा व मोफत औषधे वाटप शिबीर, सायंकाळी पाच वाजता शंकर शेवाळे महाराज यांचे “श्री चिंतामणी महाराज व श्री तुकाराम महाराज भेट’ या विषयावर व्याख्यान, रात्री आठ वाजता सलील कुलकर्णी आणि संदीप खरे यांचा “आयुष्यावर बोलू काही’ हा कार्यक्रम होणार आहे. मंगळवारी (दि. २५) सकाळी सात वाजता संस्कृती संवर्धन व विकास महासंघातर्फे सामुहिक अथर्वशीर्ष पठण, सकाळी नऊ वाजता सामूहिक महाभिषेक, रक्तदान शिबीर होणार आहे. सायंकाळी साडेपाच वाजता पुणे येथील एटीएस प्रमुख भानुप्रताप बर्गे यांचे “दहशतवाद, भारतासमोरील एक आव्हान’ यावर व्याख्यान होणार आहे. रात्री आठ वाजता रघुनंदन पणशीकर आणि सहकलाकारांचा अभंग, भक्तिगीत व नाट्यपदांचा कार्यक्रम होईल.
बुधवारी (दि. २६) रोजी सकाळी काकड आरती, महिलांचे सामुदायिक श्री सूक्त पठण व कुंकुमार्जन, वैद्यकीय शिबीर होईल. तर सायंकाळी साडेपाच वाजता शरद पोंक्षे यांचे “स्वातंत्र्यवीर विनायक दामोदर सावरकर’ या विषयावर व्याख्यान होईल. यानंतर पुरस्कार वितरण सोहळा पार पडणार आहे. रात्री नऊ वाजता बासरीवादक राकेश चौरसिया, तबला वादक विजय घाटे आणि पखवाज वादक भवानी शंकर यांची जुगल बंदी होईल.
गुरुवार (दि. २७) रोजी मोरया गोसावी यांच्या समाधी दिवशी पहाटे साडेचार वाजता मंदार महाराज देव व चिंचवड ब्रह्मवृंद यांच्या हस्ते समाधीची महापूजा व अभिषेक करून सकाळी सात वाजता भव्य दिंडी व श्री मोरया गोसावी समाधी मंदिरावर पुष्पवृष्टी करण्यात येणार आहे. त्यानंतर साडेआठ वाजता ह.भ.प. प्रमोद महाराज जगताप यांचे काल्याचे कीर्तन होणार आहे.
न्यूज पीसीएमसी Whatsapp Share करीता आपला मो.नं.रजिस्टर करा.