अंगारकी चतुर्थीदिनी चिंचवडचे मोरया गोसावी मंदिर व श्री मंगलमूर्ती वाडा बंद..

• कोरोनाच्या अनुषंगाने देवस्थानचा निर्णय…

न्यूज पीसीएमसी नेटवर्क

पिंपरी (दि. ०१ मार्च २०२१) :- पिंपरी-चिंचवड शहरातील कोरोनाच्या वाढत्या प्रादुर्भावामुळे अंगारकी चतुर्थीनिमित्त संभाव्य गर्दी टाळण्यासाठी श्रीमान महासाधू मोरया गोसावी संजीवन समाधी मंदिर व श्री मंगलमूर्ती वाडा उद्या (मंगळवारी) दिवसभर बंद राहणार आहे. याबाबतची माहिती चिंचवड देवस्थान ट्रस्टचे मुख्य विश्वस्त मंदार महाराज देव यांनी दिली.

अंगारकी संकष्टी चतुर्थीनिमित्त चिंचवडगावातील महासाधू मोरया गोसावी मंदिरात दर्शनासाठी भाविकांची मोठी गर्दी होते. तसेच दर्शनानंतर अंगारकीनिमित्त्त भरणार्‍या बाजारात देखील खरेदीसाठी नागरिकांची गर्दी होते. दिवसाला साडेतीनशे ते चारशेच्या पटीत रुग्ण आढळत आहेत.

उद्या (मंगळवारी) अंगारकी चतुर्थी आहे. चतुर्थीनिमित्त मंदिरात भाविकांची मोठी गर्दी होवू शकते. त्यातून कोरोनाचा प्रसार होण्याची शक्यता नाकारता येत नाही. त्यामुळे अंगारकी चतुर्थीनिमित्त संभाव्य गर्दी टाळण्यासाठी पोलीस आयुक्तालयाच्या आदेशानुसार श्रीमान महासाधू मोरया गोसावी संजीवन समाधी मंदिर व श्री मंगलमूर्ती वाडा उद्या (मंगळवारी) दिवसभर बंद राहणार आहे.