दुःखद… पती युपीत अनं पत्नीचा मृतदेह फुगेवाडीत..

• दीड वर्षाचा मुलगा आईजवळ निपचित..

न्यूज पीसीएमसी नेटवर्क

पिंपरी (दि. २८ एप्रिल २०२१) :- सलग दोन दिवस खोली बंद असून, दुर्गंधी येत असल्याची माहिती घरमालकाने पोलिसांना दिली. त्यानुसार पोलीस उपनिरीक्षक भीमसेन शिखरे घटनास्थळी दाखल झाले. खोलीचा बंद दरवाजा उघडून आत प्रवेश केला असता महिलेचा मृतदेह खोलीत दिसून आला. तसेच त्यांचा दीड वर्षांचा मुलगा त्यांच्या मृतदेहाजवळ निपचित पडला होता.

आईच्या मृतदेहाजवळ दोन दिवस उपाशी असल्याचे निदर्शनास आले. त्यानंतर महिला पोलीसांनी तेथे येऊन त्या मुलाला जवळ घेतले. त्याला पाणी पाजून दूध व बिस्किट खाऊ घातले. त्यानंतर त्याला पिंपरी येथील वायसीएम रुग्णालयात नेऊन त्याची वैद्यकीय तसेच कोरोना चाचणी केली. कोरोना तपासणीचा रिपोर्ट निगेटिव्ह आला. त्यानंतर त्याला दिघी येथील शिशूगृहात दाखल करण्यात आले.

मयत महिला आणि तिचा पती हे त्यांच्या दीड वर्षांच्या मुलासह दोन महिन्यांपूर्वी फुगेवस्ती येथे राहण्यास आले होते. भाडेतत्वारील खोलीत ते राहात होते. तिचा पती राजेश कुमार हा त्याच्या मुळगावी उत्तर प्रदेश येथे गेला होता.

दरम्यान,महिलेच्या यांच्या तोंडातून फेस आला होता. वायसीएम रुग्णालयात शवविच्छेदन करून व्हिसेरा राखून ठेवण्यात आला आहे. शवविच्छेदनाचा अहवाल आल्यानंतर मृत्यूचे कारण स्पष्ट होऊ शकणार आहे. मयत महिलेच्या पतीला फोन करून या घटनेबाबत पोलिसांनी माहिती दिली आहे. महिलेचा मृतदेह ससून रुग्णालयात ठेवण्यात आला आहे. पती आल्यानंतर त्यांच्या ताब्यात मृतदेह देण्यात येईल, असे पोलिसांनी सांगितले. सरस्वती राजेश कुमार (वय २९, रा. कानपूर, उत्तर प्रदेश ), असे मृत महिलेचे नाव आहे. दिघी पोलीस तपास करीत आहेत.