न्यूज पीसीएमसी नेटवर्क
पिंपरी (दि १६ एप्रिल १९) :- पिंपरी-चिंचवड जैन महासंघाच्या वतीने देण्यात येणारा अहिंसा पुरस्कार यंदा सीए भूषण तोष्णीवाल, चिंचवड देवस्थान ट्रस्टचे अध्यक्ष मंदार देव महाराज आणि अशोक देशमाने यांना जाहीर झाले आहे.
भगवान महावीर जयंतीचे औचित्य साधून उदया बुधवारी ( दि. १७) संध्याकाळी चिंचवडच्या प्रा. रामकृष्ण मोरे प्रेक्षागृहात पुरस्काराचे वितरण करण्यात येणार आहे, अशी माहिती महासंघाचे संस्थापक अध्यक्ष डॉ. अशोक कुमार पगारिया यांनी दिली.
जैन महासंघाच्यावतीने दि. ११ एप्रिलपासून अहिंसा सप्ताह सुरु झाला असून, कासारवाडी येथील जैन स्थानकात पार्श्वनाथ युवक मंडळाच्या वतीने भक्तामर पठण करण्यात आले. दि. १२ एप्रिल रोजी उद्यमनगर येथील जैन मंदिरात प्रगती महिला सोशल ग्रुपच्यावतीने भजनसंध्या तसेच दि. १३ एप्रिलला आनंद मंगल एज्युकेशन सोसायटीच्या सभागृहात वक्तृत्व स्पर्धा व निबंध स्पर्धा घेण्यात आली. दि . १४ एप्रिल रोजी केजुबाई बंधारा थेरगाव येथे रोटरी क्लब वाल्हेकरवाडी व पिंपरी – चिंचवड जैन महासंघ यांच्यावतीने जलपर्णीमुक्त पवनामाई अभियान राबविण्यात आले. तसेच पॅन हॉस्पिटल येथे जैन सोशल ग्रुपच्यावतीने आरोग्य चिकित्सा शिबिर तसेच पार्श्वपद्मावती महिला मंडळाच्यावतीने निगडी येथे पाककला स्पर्धा घेण्यात आली.
उद्या बुधवारी (दि. १७) रोजी दुपारी सव्वातीन वाजता थेरगाव जैन स्थानकातून अहिंसा रली निघणार असून, प्रा. रामकृष्ण मोरे सभागृहात या रॅलीचा समारोप होणार आहे. त्यानंतर पुरस्कार वितरणाचा कार्यक्रम होईल. तसेच मोहनकुमार भंडारी यांचा एक श्याम प्रभु के नाम हा भक्तीगीतांचा कार्यक्रम होणार आहे, असे पगारिया यांनी सांगितले.
न्यूज पीसीएमसी Whatsapp Share करीता आपला मो.नं.रजिस्टर करा.