पुणे जिल्ह्यातील बार, परमीट रूम, रेस्टॉरंटच्या वेळेत बदल..

• निवासी उपजिल्हाधिकाऱ्यांचा आदेश…

न्यूज पीसीएमसी नेटवर्क

पिंपरी (दि. ०७ मार्च २०२४) :- शहरातील बार, परमीट रूम, रेस्टॉरंट आदींना मध्यरात्री दीड वाजेपर्यंत परवानगी दिलेली असताना ग्रामीण भागात मात्र, रात्री साडेबारा वाजेपर्यंतच सुरू ठेवण्याचा आदेश निवासी उपजिल्हाधिकारी यांनी काढले आहेत.

बार, परमीट रूम, रेस्टॉरंट आदींमध्ये सार्वजनिक व्यवस्थेवर परिणाम करणाऱ्या घटना वारंवार घडत असून काही मालकांकडून नियमांचे उल्लंघन होत असल्याचे निदर्शनास आल्यामुळे हे आदेश काढण्यात आल्याचे स्पष्ट केेले आहे.

शहरातील पब, हॉटेल रात्री दीडपर्यंत खुले ठेवण्याबाबतचा आदेश पोलिस आयुक्तांनी नुकताच काढला आहे. शहरातील पब हे ग्रामीण भागातील पबपेक्षा लवकर बंद होत असल्याने ग्राहकांनी आपला मोर्चा शहरालगतच्या गावांमध्ये असलेल्या हुक्का पार्लर आणि बारकडे वळविला आहे. त्यामुळे अनेक हुक्का पार्लर, बार, परमीट रूम हे पहाटेपर्यंत सुरू असल्याच्या तक्रारी पोलिसांकडे आल्या होत्या. अशा घटनांना आळा घालण्यासाठी आणि परिसरात शांतता राखण्यासाठी ग्रामीण भागातील हॉटेल, परमीट रूम, हुक्का पार्लर यांच्या नियमनासाठी आदेश काढण्याची विनंती जिल्हा पोलिस अधीक्षकांनी जिल्हा प्रशासनाला केली होती. त्यानुसार जिल्हा प्रशासनाने आदेश जारी केला. आदेशाचे पालन न करणाऱ्यांवर कारवाई केली जाईल, असा इशारा कदम यांनी दिला आहे.

जिल्हा प्रशासनाने काढलेल्या आदेशात ग्रामीण भागातील सर्व बार, परमीट रूम रात्री साडेबारा वाजता पूर्णपणे बंद करण्याचे स्पष्ट करण्यात आले आहे. हॉटेलमध्ये येण्या-जाण्याचा मार्ग, ग्राहक बसण्याची जागा, बार काऊंटर आदी ठिकाणी सीसीटीव्ही बसवावेत असेही त्यात सांगण्यात आले आहे. ग्राहक बसण्याच्या जागी कुठल्याही प्रकारचे नृत्य करण्याची परवानगी नसेल, असेही स्पष्ट करण्यात आले आहे.