अमित शाह यांच्या दौऱ्यावेळी उपमुख्यमंत्री अजित पवार अनुपस्थित…

न्यूज पीसीएमसी नेटवर्क

मुंबई (दि. ०९ सप्टेंबर २०२४) :- महाराष्ट्रात लवकरच विधानसभा निवडणूक होणार आहे. तसंच सध्या गणेशोत्सव सुरु आहे. या पार्श्वभूमीवर देशाचे गृहमंत्री अमित शाह मुंबई दौऱ्यावर आहेत. काल त्यांनी भाजपची महाराष्ट्रातील नेत्यांची बैठक घेतली.

त्यानंतर उपमुख्यमंत्री देवेंद्र फडणवीस आणि आशिष शेलार यांच्या घरी जात गणपती बाप्पाचं दर्शन घेतलं. अमित शाह यांच्या या दौऱ्यावेळी उपमुख्यमंत्री अजित पवार अनुपस्थित आहेत. त्यामुळे अजित पवारांच्या मनात नेमकं काय सुरु आहे? अशी चर्चा राजकीय वर्तुळात रंगली आहे.

अजित पवार काल बारामतीत होते. पण काल रात्री ते मुंबईत आले. त्यानंतर अजित पवार अमित शाहांना भेटणार असल्याचं बोललं जात होतं. मात्र अद्यापपर्यंत त्यांची भेट झाली नसल्याचं समोर आलं आहे. मुंबईत असतानाही अजित पवार आणि अमित शाह यांची भेट न झाल्याने चर्चांना उधाण आलं आहे.

५ ऑगस्टला राज्य मंत्रिमंडळाची बैठक झाली. या बैठकीलाही अजित पवार उपस्थित नव्हते. काल बारामतीतील कसब्यात असणाऱ्या ‘राष्ट्रवादी भवन’मध्ये काही नेत्यांनी राष्ट्रवादी अजित पवार गटात प्रवेश केला. यावेळी अजित पवार उपस्थित होते. हा बारामती दौरा आटोपता घेत अजित पवार तातडीने मुंबईत आले. मात्र मुंबईत असूनही अजित पवारांनी अमित शाहांची भेट न घेतल्याने राजकीय वर्तुळात चर्चा रंगली आहे.