भाजपच्या बड्या नेत्याच्या मुलाच्या अलिशान गाडीने पाच दुचाकी आणि चारचाकी वाहनांना ठोकलं…

न्यूज पीसीएमसी नेटवर्क

नागपूर (दि. १० सप्टेंबर २०२४) :- ऑडीने रविवारी मध्यरात्री नागपूर शहरात पाच दुचाकी आणि चारचाकी वाहनांना धडक दिली. या घटनेत कुणीही जखमी झाले नसले, तरी वाहनांचे मोठ्या प्रमाणात नुकसान झाले आहे. याप्रकरणी सीताबर्डी पोलिसांनी दोघांना अटक केली आहे. विशेष म्हणजे, या वाहनाची नोंदणी भाजपचे प्रदेशाध्यक्ष चंद्रशेखर बावनकुळे यांचा मुलगा संकेत यांच्या नावाने आहे.

पोलिसांच्या माहितीनुसार, संकेत यांची मोटार त्यांचा चालक अर्जुन हावरे (२४) आणि रोनित चिंतमवार (२७) यांना चालवायला दिली होती. याच मोटारीने रविवारी मध्यरात्री पाच वाहनांना धडक दिली. अपघातग्रस्त जितेंद्र सोनटक्के (४०) यांनी दिलेल्या तक्रारीवरून सीताबर्डी पोलिसांनी चालक हावरे आणि चिंतमवार यांना अटक केली.

पोलिसांनी मोटार जप्त करून पोलीस ठाण्यात आणली. त्यावेळी तिची ‘नंबर प्लेट’ काढण्यात आल्याचे उघड झाले. कार कुणाच्या नावावर आहे, याची माहिती वाहतूक कार्यालयाकडून मागविल्याचे पोलीस अधिकारी चंद्रशेखर चकाटे यांनी सांगितले.

कार माझ्या मुलाच्या नावावर आहे. पोलिसांनी नि:ष्पक्ष चौकशी करावी. दोषी असतील त्यांच्यावर गुन्हे दाखल व्हावेत.
– चंद्रशेखर बावनकुळे, प्रदेशाध्यक्ष, भाजप…