‘ब्ल्यू लाईन’मधील बांधकामे कधी पाडणार?..

• महापालिका प्रशासनावर राजकीय दबाव?…

न्यूज पीसीएमसी नेटवर्क

पिंपरी (दि. २९ डिसेंबर २०२४) :- पवना, मुळा आणि इंद्रायणी नद्यांच्या निळ्या पूररेषेतील अनधिकृत बांधकामांवरील कारवाई विधानसभा निवडणुकीपूर्वी पिंपरी- चिंचवड महापालिकेकडून थांबली होती. ती कारवाई पुन्हा सुरू करण्यात येणार की, त्याकडे दुर्लक्ष होणार? असा प्रश्न नागरिकांकडून उपस्थित केला जात आहे.

चिखली येथील इंद्रायणी नदीच्या निळ्या पूररेषेत असलेले २९ बंगले आणि इतर अनधिकृत बांधकामे तोडण्याचे आदेश राष्ट्रीय हरित लवाद तसेच, सर्वोच्च न्यायालयाने महापालिका प्रशासनास दिले होते. कारवाईची मुदत ३१ डिसेंबरपर्यंत होती. त्यास काही काळ अंतरिम स्थगिती मिळाली आहे.

महापालिकेने संपूर्ण शहरातील पवना, मुळा आणि इंद्रायणी नदीच्या निळ्या पूररेषेतील अनधिकृत बांधकामांचे सर्वेक्षण केले होते. त्यात बिगरनिवासी व निवासी बांधकामे अशी वर्गवारी केली होती. प्रथम बिगरनिवासी बांधकामांवर महापालिकेने केली होती.

विधानसभा निवडणुका लागणार असल्याने महापालिकेने ती कारवाई बंद केली होती. निवडणूक आता संपली असल्याने पुन्हा ही कारवाई सुरू करणार का, असा प्रश्न उपस्थित केला जात आहे. तर, दुसरीकडे कारवाई होऊ नये म्हणून महापालिका प्रशासनावर राजकीय दबाव वाढला असल्याचे सूत्रांनी सांगितले.