न्यूज पीसीएमसी नेटवर्क
इंदोरी (दि.५ फेब्रुवारी२०२५) :- जगद्गुरू, संतश्रेष्ठ तुकाराम महाराजांची चिंतन भूमी असणाऱ्या श्रीक्षेत्र भंडारा डोंगरावर तुकोबारायांच्या आकाशाएवढ्या कार्याला साजेसे भव्य-दिव्य मंदिर व्हावे, ही सकल वारकरी संप्रदाय व तुकोबारायांवर नितांत श्रद्धा असणाऱ्या प्रत्येक भाविकांचे स्वप्न प्रत्यक्षात साकार होत आहे. आजअखेर या मंदिराचे ७० टक्के काम पूर्ण झाले आहे. वारकरी संप्रदायातील हे पहिलेच भव्य- दिव्य असे मंदिर असून येत्या वर्षभरात मंदिराचे काम पूर्ण करून भव्य-दिव्य असा लोकार्पण सोहळा करण्याचा आमचा प्रयत्न असेल अशी माहिती श्री क्षेत्र भंडारा डोंगर ट्रस्टचे अध्यक्ष बाळासाहेब काशीद व मंदिर बांधकामाचे नियोजन करणारे गजानन शेलार यांनी दिली.
या मंदिरासाठी स्थापत्यविशारद म्हणून आयोध्यानगरीतील श्री प्रभू श्रीरामचंद्रांचे मंदिर ज्यांच्या अलौकिक स्थापत्यकलेतून विराजमान होत आहे ते चंद्रकांत सोमपूरा व निखील सोमपुरा बंधू कार्यरत आहेत. तसेच मंदिराच्या निर्मितीची जबाबदारी रमेशचंद्र सोमपुरा आणि परेशभाई सोमपुरा या पिता पुत्रांनी घेतली आहे. गांधीनगर, गुजरात येथील जगप्रसिद्ध अशा अक्षरधाम मंदिराच्या आधारावर संत तुकाराम महाराजांचे हे भव्य-दिव्य मंदिर निर्माणाचे कार्य सुरु आहे. मंदिराची लांबी १७९ फुट, उंची ८७ फुट व रुंदी १९३ फुट असून मंदिराला तीन भव्य कळस असणार आहेत. मंदिराचा घुमट ३४ फुट बाय ३४ फुट असून १३.५ बाय १३.५ फुट आकाराची एकूण ५ गर्भग्रहे मंदिरात असणार आहेत. मंदिराच्या मध्यभागी मुख्य जागेवर श्री विठ्ठल-रुख्मिणीची मूर्ती व या मूर्तीकडे पाहत भक्तीमध्ये दंग झालेली श्री संत तुकाराम महाराजांच्या मूर्तीची प्रतिस्थापना करण्यात येणार आहे.मंदिराचे बाहेरील खांब हे चौरसाकृती व आतील खांब हे अष्टकोनाकृती असून त्यावर ९०० वैष्णवांच्या मूर्तींचे सुंदर असे कोरीव काम असणार आहे. त्याचप्रमाणे विश्ववंदनीय जगद्गुरू संतश्रेष्ठ तुकाराम महाराज व संपूर्ण हिंदुस्तानामध्ये रयतेचे राज्य ही लोकशाही पूरक संकल्पना ज्यांनी प्रत्यक्षात प्रथम अंमलात आणली ते हिंदवी स्वराजाचे संस्थापक छत्रपती श्री शिवाजी महाराज यांचे धारकरी व वारकरी यांच्यासह भव्य-दिव्य शिल्प साकारले जाणार आहे. भंडारा डोंगरावरील हे भव्य-दिव्य मंदिर निर्माणाचे पवित्र कार्य लवकरात लवकर पूर्णत्वास जावे याकरिता वारकरी संप्रदायातील सर्व थोर कीर्तनकार, प्रवचनकार, महाराज मंडळी तसेच तुकोबारायांवर नितांत श्रद्धा असणारे समाजजीवनाच्या विविध क्षेत्रात कार्यरत असणारे सर्व लहानथोर या मंदिर निर्माणाच्या कार्याला मदत करीत आहेत.
मंदिराचे काम मोठ्या प्रमाणात आकार घेऊ लागल्याने माघ शुद्ध दशमीच्या निमित्ताने आयोजित करण्यात आलेल्या ‘अखंड हरीनाम सप्ताह व कीर्तन महोत्सवास’ देखील भाविकांची मोठी गर्दी होत आहे. पहाटेची काकडा आरती, अभिषेक, महापूजा संपन्न झाल्यानंतर सकाळी व दुपारी अशा दोन सत्रात हभप नाना महाराज तावरे यांच्या व्यासपीठ नेतृत्वाने अवीट, रसाळ वाणीतून गाथा पारायण संपन्न झाले. सायंकाळी ४ ते ६ या दरम्यान ‘संत तुकोबांची हृदय स्पंदने एक अनुभूती’ हा हभप डॉ. सुदाम महाराज पानेगावकर यांचा संत तुकाराम महाराजांच्या अभंगावर आधारित चिंतनाचा कार्यक्रम झाला. रात्री ८ वाजता हभप उद्धव महाराज मंडलिक यांची भक्तीचे ‘ते वर्म जयाचिये हाती | तया घरी शांती क्षमा दया || तुका म्हणे त्याचा देव सर्व भार | चालवी कामार होऊनिया ||’ या संत तुकोबारायांच्या अभंगावर कीर्तन सेवा संपन्न झाली.
संत तुकोबारायांचा माघ शुद्ध दशमी सोहळा शुक्रवार, दि. ७ फेब्रुवारी रोजी असून यानिमित्ताने पुणे जिल्यातील अनेक दिंडया तसेच लाखो भाविक दर्शनासाठी भंडारा डोंगरावर दरवर्षी येत असतात. दशमीच्या दिवशी अखंडपणे लाखो भाविकांसाठी महाप्रसादाचे नियोजन करण्यात आले आहे. व्याख्याते, युवा कीर्तनकार हभप गणेश शिंदे व सूर नवा ध्यास नवा या पर्वाच्या विजेत्या, महाराष्ट्रातील सुप्रसिद्ध गायिका सौ. सन्मिता शिंदे यांचा ‘तुका आकाशा एवढा’ हा संगीतमय कार्यक्रम होणार असून दुपारी १.३० वा. डॉ. रामचंद्र देखणे साहित्य कला प्रतिष्ठाण प्रस्तुत, डॉ. भावार्थ देखणे व सहकलाकार ‘बहुरूपी भारूड’ सदर करणार आहेत अशी माहिती भंडारा डोंगर ट्रस्टचे अध्यक्ष बाळासाहेब काशीद यांनी दिली. दशमीच्या दिवशी डोंगरावर लाखो भाविकांची गर्दी होणार असून चार चाकी व दूचाकी वाहनांसाठी पायथ्यालाच पार्किंगची व्यवस्था करण्यात आली आहे. डोंगरावर जाण्यासाठी भाविकांच्या सोयीसाठी १५ बसची सोय करण्यात आली असून तसे सूचना फलक देखील लावण्यात आले असून सर्व भाविकांनी सहकार्य करावे असे पोलीस प्रशासनाने आवाहन केले आहे.
न्यूज पीसीएमसी Whatsapp Share करीता आपला मो.नं.रजिस्टर करा.