न्यूज पीसीएमसी नेटवर्क
पिंपरी (दि. १० मार्च २०२५) :- चिंचवड येथील चापेकर चौकात २०० हून अधिक नागरिकांनी मानवी साखळी तयार करून, पिंपरी-चिंचवड महापालिकेच्या नदीकाठ विकास प्रकल्पाला विरोध केला. स्थानिक नद्यांच्या शुद्धीकरणासाठी त्वरित उपाययोजना करण्याची मागणी केली.
चिंचवडच्या चापेकर चौकात जमलेल्या नागरिकांनी पवना, मुळा व इंद्रायणी नद्यांच्या आरोग्य व भविष्यासाठी चिंता व्यक्त केली. नागरिकांनी नदी प्रदूषण रोखणे, शंभर टक्के सांडपाणी प्रक्रिया सुनिश्चित करणे आणि कोणत्याही प्रकारचे बांधकाम न करता नैसर्गिक नदीकाठ जपण्याची गरज अधोरेखित केली. या आंदोलनात अनेक स्थानिक स्वयंसेवी संस्था, पर्यावरण संघटना आणि सामाजिक प्रतिष्ठानांनी सक्रिय सहभाग नोंदवला.
पिंपरी-चिंचवडमधील नद्यांना अनेक वर्षांपासून प्रदूषणाचा फटका बसत आहेत. स्थानिक स्वयंसेवी संस्था, पर्यावरणप्रेमी आणि लोकप्रतिनिधींनी नद्यांचे पुनरुज्जीवन करण्यासाठी वारंवार मागणी केली असली, तरी महापालिका प्रशासनाकडून याकडे दुर्लक्ष होत असल्याचे नागरिकांचे व पर्यावरणप्रेमींचे म्हणणे आहे.
पिंपरी-चिंचवडमधील नद्या पाणीपुरवठ्यासह सांस्कृतिक आणि ऐतिहासिकदृष्ट्याही महत्त्वयाच्या आहेत. मात्र, त्यांची हेळसांड होत आहे. यामध्ये सकारात्मक बदल घडवण्यासाठी, नागरिकांनी मानवी साखळीच्या माध्यमातून आपला विरोध नोंदवला.
आंदोलनातून प्रत्येक पिंपरी-चिंचवडकराने नद्यांचे रक्षण करण्यासाठी पुढे येण्याची जबाबदारी अंगीकारावी, असा संदेश दिला. यावेळी आमदार अमित गोरखे यांना निवेदन दिले. त्यांनी शासन पातळीवर यावर सकारात्मक निर्णय घेऊ असे सांगितले.
न्यूज पीसीएमसी Whatsapp Share करीता आपला मो.नं.रजिस्टर करा.