नागरिकहो प्रारूप विकास आराखड्याविरूध्द अशा करा तक्रारी..

• अशी आहे हरकत नोंदवण्याची प्रक्रीया…

न्यूज पीसीएमसी नेटवर्क

पिंपरी (दि. ३० मे २०२५) :- नुकताच पिंपरी चिंचवड महापालिकेने महाराष्ट्र नगररचना अधिनियम १९६६ कलम २६ (१) प्रमाणे शहर विकास आराखडा जाहीर केला. परंतु जाहीर झालेल्या प्रारूप विकास आराखडयामध्ये अनेक त्रुटी असल्याने शहर नागरिक व भूमिपूत्रांनी नाराजीचा सूर प्रकट करण्यास सुरुवात केली आहे. परंतु कुठलाही शहराचा प्रारूप विकास आराखडा प्रसिद्ध झाल्यास कायदेशीर पद्धतीने नागरिकांना विकास आराखडा फेरबदल करण्यासाठी सहभागी होण्याची व्यवस्था व तरतूद महाराष्ट्र नगररचना अधिनियम १९६६ मध्ये कलम २५ (२), २६ (२), २८(०३) तसेच राजपत्रित कार्यपद्धतीनुसार कलम १५१ अन्वये २०(३),२० (४) केलेली असल्याने नागरिकांनी त्यांच्या मूलभूत अधिकाराचा वापर मोठ्या संख्येने सहभागी होऊन आमलात आणणे आवश्यक आहे. त्यासाठी नागरिकांनी हरकती नोंदवाव्यात, असे आवाहन घर बचाव संघर्ष समितीचे मुख्य समन्वयक डाॅ. विजय कुमार पाटील यांनी केले आहे.

तुमच्या सूचनांवर कलम २८(२) नुसार ५;सदस्यीय नियोजन समिती प्रारूप आराखड्यात बदल सूचित करते. त्यामुळे प्रारूप आराखडायामध्ये नागरिकांच्या सहभागामुळे अंतिम आराखडा तयार होत असतो. राज्य शासनही नागरिकांच्या प्रस्तावांचा विचार करून फेरबदल करून कलम ३१(१) अन्वये विकास आराखडा अधिसूचना जाहीर करते. त्यामळे नागरिकांनी प्रारूप आराखडा रचनेमुळे गोंधळून न जाता कायदेशीर प्रक्रियेमध्ये सहभागी होऊन आपला प्रस्ताव किंवा बदल नियोजन समितीस लेखी सुचनांद्वारे येत्या ४० दिवसांमध्ये नगररचना उपसंचालक यांचेकडे जमा करावा.

हरकत नोंदवण्याची प्रक्रिया:

1. प्रारूप आराखडा समजावून घ्या:
प्रारूप आराखडा व्यवस्थितपणे वाचा. त्यात काय नमूद केले आहे, कोणत्या योजना आहेत, कोणत्या नियमांचे पालन केले आहे, हे तपासा. आराखड्यात तुमच्या दृष्टीने काही त्रुटी किंवा गैरसमज वाटल्यास, त्या नोंदवून ठेवा.

2. हरकत नोंदवण्यासाठी अर्ज तयार करा:
अर्ज संबंधित अधिकाऱ्याकडे (उदा. महानगरपालिका आयुक्त, उपसंचालक नगरचनाकार) सादर करा.
अर्जात तुमची माहिती (नाव, पत्ता, संपर्क क्रमांक) नमूद करा.
आराखड्यातील कोणत्या मुद्द्यावर तुम्हाला हरकत आहे, हे स्पष्टपणे नमूद करा.
तुमच्या हरकतीचे कारण आणि पुरावा (उदा. नकाशा, कागदपत्रे) जोडल्यास, ते अधिक प्रभावी राहील.

3. अर्ज सादर करा:
अर्ज संबंधित अधिकाऱ्याच्या कार्यालयात किंवा ऑनलाइन (जर सुविधा उपलब्ध असेल) सादर करा.
अर्जाची प्रत तुमच्याकडे ठेवा, जेणेकरून तुम्हाला अर्जाचा पाठपुरावा करता येईल.

4. हरकतीचा पाठपुरावा करा:
हरकती नोंदवल्यानंतर, त्यावर काय निर्णय झाला, हे नियमितपणे तपासा.
आवश्यक असल्यास, अधिकाऱ्यांशी संपर्क साधा आणि हरकतीवर होणाऱ्या प्रक्रियेची माहिती घ्या.

सेक्टर चा उल्लेख करा
सेक्टर १ – समाविष्ट गावे: आकुर्डी, चिंचवड आणि निगडी (५ शीट्स), सेक्टर २ – समाविष्ट गावे: पिंपरी गाव (३ शीट्स), सेक्टर ३ – समाविष्ट गावे: भोसरी आणि दापोडी (६ शीट्स), सेक्टर ४ – समाविष्ट गावे: पिंपळे गुरव, सांगवी, पिंपळे सौदागर, पिंपळे निलख, रहाटणी आणि थेरगाव (८ शीट्स). (येथे ‘पिंपळे गुरव’ आणि ‘सांगवी’ ची पुनरावृत्ती वगळली आहे.) सेक्टर ५ – समाविष्ट गावे: तळवडे, चिखली, बोऱ्हाडेवाडी आणि मोशी (८ शीट्स), सेक्टर ६ – समाविष्ट गावे: डुडुळगाव, चोवीसवाडी, वडमुखवाडी, चऱ्होली, दिघी आणि बोपखेल (१० शीट्स), सेक्टर ७ समाविष्ट गावे: वाकड, ताथवडे आणि पुनावळे (६ शीट्स) आणि सेक्टर ८ समाविष्ट गावे: रावेत, किवळे आणि मामुर्डी (४ शीट्स). अशा पद्धतीने सुधारित विकास आराखडा महानगरपालिकेच्या वेबसाईटवर उपलब्ध आहे.