वस्तूंचा पुनर्वापर करा, गरजूंना आधार द्या!

• महापालिकेच्या आरआरआर केंद्रात वापरायोग्य वस्तु जमा करा…

न्यूज पीसीएमसी नेटवर्क 

पिंपरी, (दि. ८ सप्टेंबर २०२५) :- पिंपरी चिंचवड महापालिकेच्या आरोग्य विभागाने स्वच्छ भारत मिशन अंतर्गत शहरात रीड्यूस–रीयुज–रिसायकल (RRR) सेंटर सुरू केले आहेत. आठही क्षेत्रीय कार्यालयांत उभारलेल्या या केंद्रांत नागरिकांकडून वापरण्यायोग्य पण न वापरल्या जाणाऱ्या वस्तू संकलित केल्या जातात. त्यांचे वर्गीकरण करून उपयुक्त वस्तू थेट गरजूंना दिल्या जातात, तर उर्वरित साहित्य रिसायकल प्रक्रियेद्वारे पुनर्वापरात आणले जाते. या उपक्रमामुळे कचरा कमी होऊन पर्यावरण संवर्धनास मदत होत आहे.

महापालिका आयुक्त शेखर सिंह, अतिरिक्त आयुक्त विजयकुमार खोराटे व उपायुक्त सचिन पवार यांच्या मार्गदर्शनाखाली हा उपक्रम राबविला जात आहे. शालेय साहित्य, कपडे, खेळणी, घरगुती साहित्य, फर्निचर, इलेक्ट्रॉनिक उपकरणे अशा विविध वस्तू नागरिकांनी या केंद्रांवर जमा करता येतात.

“आर.आर.आर. सेंटर ही काळाची गरज आहे. वापरण्यायोग्य वस्तू कचऱ्यात न टाकता गरजूंना दिल्यास पर्यावरण वाचते,” असे खोराटे म्हणाले. तर उपायुक्त पवार यांनी “या माध्यमातून पुनर्वापर संस्कृती रुजण्यास मदत होईल,” असे सांगितले.

प्रभागनिहाय आर.आर.आर. सेंटरची ठिकाणे…

महापालिकेने नागरिकांना आवाहन केले आहे की, घरात वापरात नसलेल्या पण उपयुक्त वस्तू कचऱ्यात न टाकता जवळच्या आर.आर.आर. सेंटरवर जमा करून गरजूंना मदत करावी व पर्यावरणाचे रक्षण करावे.