मतदान तोंडावर तरीही महापौरपदाच्या आरक्षणाचा तिढा का सुटेना?..

• निकालानंतरच्या सत्तास्थापनेच्या गणितांवर परिणाम होण्याची शक्यता?…
• राजकीय वर्तुळात चर्चांना उधान… 

मा. अशोक लोखंडे :- संपादक तथा प्रतिनिधी

न्यूज पीसीएमसी नेटवर्क

पिंपरी-चिंचवड (दि. १४ जानेवारी २०२६) :- पिंपरी-चिंचवड महापालिका निवडणुकीचा प्रचार मंगळवारी सायंकाळी संपला असून आता शहराचे लक्ष उद्याच्या मतदानाकडे लागले आहे. गुरुवारी, दि. १५ जानेवारी रोजी मतदान तर त्यानंतरच्या दिवशी मतमोजणी होणार आहे. मात्र, निवडणूक प्रक्रियेच्या अंतिम टप्प्यातही महापौर पदाचे आरक्षण अद्याप जाहीर न झाल्याने राजकीय वर्तुळात विविध तर्कवितर्कांना उधाण आले आहे.

महापौर पदाच्या आरक्षणाबाबत आवश्यक असलेली सर्व माहिती पिंपरी-चिंचवड महानगरपालिकेने सप्टेंबर २०२५ मध्येच राज्य शासनाकडे सादर केली होती. यामध्ये शहराची लोकसंख्या, आजपर्यंत लागू झालेल्या महापौर आरक्षणाचा प्रवर्ग, कालावधी तसेच आरक्षण संपुष्टात येण्याचा तपशील समाविष्ट होता. २०११ च्या जनगणनेनुसारची माहितीही शासनाला पाठविण्यात आली आहे.

आतापर्यंत पिंपरी-चिंचवड महापालिकेच्या महापौरपदी खुला प्रवर्ग, नागरिकांचा मागास प्रवर्ग (ओबीसी) आणि अनुसूचित जमाती (एसटी) या प्रवर्गातील नगरसेवकांना संधी मिळाली आहे. मात्र, अनुसूचित जाती (एससी) प्रवर्गासाठी महापौरपदाचे आरक्षण अद्याप लागू झालेले नाही, याकडे राजकीय अभ्यासकांचे लक्ष आहे.

महापौर पदाचे आरक्षण राज्य सरकारच्या नगरविकास विभागामार्फत जाहीर केले जाते. निवडणूक जवळ येऊनही आरक्षण घोषित न झाल्याने निकालानंतरच्या सत्तास्थापनेच्या गणितांवर त्याचा परिणाम होणार असल्याची चर्चा सुरू आहे. त्यामुळे मतदानानंतर महापौरपदाचे आरक्षण कोणत्या प्रवर्गासाठी जाहीर होणार, याबाबत शहरात उत्सुकता शिगेला पोहोचली आहे.

महापौर पदाचे आरक्षण राज्य सरकारच्या नगरविकास विभागामार्फत काढले जाते. अद्याप आरक्षण काढण्यात आलेले नाही.
– दिनेश वाघमारे, आयुक्त, राज्य निवडणूक आयोग…