अजित पवारांच्या अकाली जाण्याने आखिल वारकरी संप्रदायासह महाराष्ट्राची अतोनात हानी – बाळासाहेब काशीद…

• महाराष्ट्राच्या लाडक्या दादाला श्रीक्षेत्र भंडारा डोंगर ट्रस्ट व अखिल वारकरी संप्रदायाच्या वतीने भावपूर्ण श्रद्धांजली…!

न्यूज पीसीएमसी नेटवर्क 

देहूगाव (दि. 28 जानेवारी 2026) :- जगद्गुरु श्री संत तुकोबारायांची अनुग्रह भूमी, चिंतन भूमी असणाऱ्या श्रीक्षेत्र भंडारा डोंगरावर तुकोबारायांचे भव्य- दिव्य असे मंदिर निर्माण कार्य होत असतानाच श्रीक्षेत्र भंडारा डोंगर पायथ्याला 100 एकर परिसरात बालाजी देवस्थान प्रमाणेच भव्य असे कॉरिडॉरचे काम व्हावे. त्यासाठी महाराष्ट्र शासनाच्या वतीने मी हजारो कोटी रुपयाचा निधी या कार्यासाठी देईन, अशी ग्वाही महाराष्ट्र राज्याचे उपमुख्यमंत्री अजितदादा पवार यांनी मागील तुकाराम महाराज बीजेच्या सोहळ्याच्या निमित्ताने श्रीक्षेत्र भंडारा डोंगर येथे दिली होती.

तुकाराम बीजेच्या दिवशी दादा सकाळी आठ वाजता श्रीक्षेत्र भंडारा डोंगरावर आले होते व तीन तास थांबून मंदिराचे काम दादांनी बारकाईने पाहिले होते. दादांनी संपूर्ण मंदिराच्या व कॉरिडॉरच्या आराखडा बाबत सविस्तर माहिती जाणून घेतली होती. घड्याळाच्या काट्या प्रमाणे वक्तशीरपणे अहोरात्र मायबाप जनतेच्या सेवेसाठी कार्यरत असणारे, स्पष्ट वक्ते व उमदे नेतृत्व मात्र आकस्मिकपणे वेळ चुकवून आज आपल्यातून हरपले. त्यामुळे अखिल वारकरी संप्रदायासह संपूर्ण महाराष्ट्राचेच अतोनात हानी झाली आहे, संपूर्ण महाराष्ट्र आज निशब्द झाला आहे, अशा शब्दात श्रीक्षेत्र भंडारा डोंगर ट्रस्टचे अध्यक्ष बाळासाहेब काशीद व वारकरीरत्न छोटे माऊली महाराज कदम यांनी महाराष्ट्राच्या या लाडक्या दादाला भावपूर्ण श्रद्धांजली अर्पण केली. दादांच्या श्रीक्षेत्र भंडारा डोंगर वरील भेटीच्या वेळीची चित्रफित यावेळी दाखविण्यात आली.

माघ शुद्ध दशमी हा विश्ववंदनीय, जगद्गुरु संत तुकोबारायांचा अनुग्रह दिन, साक्षात्कार दिन. यानिमित्ताने गेली 72 वर्ष श्रीक्षेत्र भंडारा डोंगर ट्रस्टच्या वतीने अखंड हरिनाम सप्ताह व किर्तन महोत्सव, गाथा पारायण आयोजित करण्यात येते. यावर्षी हा सोहळा वारकरीरत्न छोटे माऊली महाराज कदम यांच्या नेतृत्वात श्रीक्षेत्र भंडारा डोंगर पायथ्याला भव्य स्वरूपात साजरा होत आहे. परंतु आज सकाळी साडेनऊच्या दरम्यान दादांच्या दुःखद अकस्मिक निधनाची बातमी येताच सर्वजण सुन्न झाले. नामस्मरणाचा हा यज्ञ असल्या कारणाने बहुरूपी भारुडाचा कार्यक्रम रद्द करून इतर सांप्रदायिक कार्यक्रम सुरू होते.

माघ शुद्ध दशमीच्या निमित्ताने सकाळी सहा वाजता मावळ तालुक्याचे तहसीलदार श्री व सौ. देशमुख साहेब यांच्या शुभहस्ते श्री विठ्ठल-रुखमाई व जगद्गुरु तुकोबारायांच्या मूर्तींची विधिवत पूजा करून अभिषेक झाला. दुपारी युवा कीर्तनकार हभप सचिन महाराज पवार यांची कीर्तन सेवा संपन्न झाली. दुपारी 3 वाजता वारकरीरत्न छोटे माऊली महाराज कदम यांच्या रसाळ, सुमधूर वाणीतून संत ज्ञानेश्वर महाराज यांच्या जीवन चरित्रावर कथा झाली.