‘आयटीआय’चे विद्यार्थी गिरवणार जपानी व जर्मन भाषेचे धडे..

• ‘स्किल्ड वर्कफोर्स’ घडविण्यास अभिषेक बारणे यांचे प्राधान्य..
• स्थायी समिती सभेत दिली खर्चाला मान्यता…

न्यूज पीसीएमसी नेटवर्क

पिंपरी चिंचवड (दि. २० ऑगस्ट २०२६) :- पिंपरी-चिंचवड महानगरपालिकेच्या औद्योगिक प्रशिक्षण संस्थांमधील (आयटीआय) विद्यार्थ्यांना जपानी आणि जर्मन भाषा शिकविण्याचा महत्त्वपूर्ण निर्णय घेण्यात आला आहे. शहरातील तसेच शिक्षणासाठी पिंपरी-चिंचवडमध्ये बाहेरून आलेल्या विद्यार्थ्यांना या उपक्रमाचा मोठा फायदा होणार आहे. विद्यार्थ्यांना केवळ पारंपरिक तांत्रिक शिक्षण न देता त्यांना जागतिक रोजगार बाजारपेठेसाठी सक्षम आणि ‘स्किल्ड’ बनविण्याच्या उद्देशाने स्थायी समितीचे सभापती अभिषेक बारणे यांनी या शैक्षणिक विषयाला विशेष महत्त्व देत प्रस्तावाला मंजुरी दिली आहे.

महापालिकेच्या मोरवाडी आणि कासारवाडी येथील आयटीआय संस्थांमध्ये विद्यार्थ्यांना जपानी व जर्मन भाषा शिकविण्यासाठी संस्थेची नियुक्ती करण्यात येणार आहे. या अभ्यासक्रमासाठी विद्यार्थ्यांकडून १५ ते १७ हजार रुपये शुल्क आकारले जाणार आहे. त्यामुळे आर्थिकदृष्ट्या सर्वच विद्यार्थ्यांना हे प्रशिक्षण सहज उपलब्ध होईल, यासाठी शुल्काचा मुद्दाही महत्त्वाचा ठरणार आहे.

या प्रशिक्षणासाठी वार्षिक सुमारे ३८ लाख रुपयांचा अंदाजित खर्च निश्चित करण्यात आला होता. मे. नालंदा फाउंडेशन, दापोडी यांनी मोरवाडी व कासारवाडी येथे जपानी आणि जर्मन भाषा शिकविण्यासाठी ३२ लाख ४४ हजार ३०० रुपयांचा दर सादर केला आहे. हा दर अंदाजित दरापेक्षा सुमारे १४.५७ टक्के कमी असल्याचे नमूद करण्यात आले आहे.

परदेशी भाषा म्हणजे रोजगाराची अतिरिक्त ‘स्किल’.. 

आजच्या औद्योगिक आणि जागतिक स्पर्धेच्या युगात केवळ तांत्रिक कौशल्य पुरेसे राहिलेले नाही. परदेशी भाषेचे ज्ञान ही रोजगारासाठी महत्त्वाची अतिरिक्त कौशल्यक्षमता बनली आहे. विशेषतः जपानी आणि जर्मन कंपन्यांचा महाराष्ट्रातील औद्योगिक क्षेत्रात मोठा सहभाग असल्याने या भाषांचे ज्ञान असलेल्या तांत्रिक मनुष्यबळाला भविष्यात अधिक संधी उपलब्ध होऊ शकतात. आयटीआयमध्ये प्रशिक्षण घेणाऱ्या विद्यार्थ्यांना अभ्यासक्रम पूर्ण झाल्यानंतर संबंधित भाषेची परीक्षा देण्याची आणि अधिकृत प्रमाणपत्र मिळविण्याची संधी मिळणार आहे. त्यामुळे विद्यार्थ्यांच्या शैक्षणिक पात्रतेसोबतच त्यांच्या कौशल्यांच्या ‘प्रोफाइल’मध्ये आणखी एका महत्त्वपूर्ण कौशल्याची भर पडणार आहे. याशिवाय प्रशिक्षणार्थींना भारतात किंवा परदेशात रोजगार मिळविण्यासाठी आवश्यक मार्गदर्शन, स्टार्टअप तसेच विविध शासकीय योजनांची माहिती देण्याची जबाबदारीही संबंधित संस्थेवर असणार आहे.

‘स्किल्ड वर्कफोर्स’ निर्मितीला चालना.. 

पिंपरी-चिंचवड हे औद्योगिक शहर असल्याने कुशल मनुष्यबळाची मोठी गरज आहे. ऑटोमोबाईल, अभियांत्रिकी, उत्पादन आणि विविध औद्योगिक क्षेत्रांमध्ये तांत्रिक कौशल्यासोबत परदेशी भाषेचे ज्ञान असणाऱ्या मनुष्यबळाची मागणी वाढत आहे. ही गरज ओळखून महापालिकेच्या आयटीआयमधील विद्यार्थ्यांना भविष्यातील रोजगाराच्या संधींसाठी तयार करण्याचा हा उपक्रम महत्त्वाचा ठरणार आहे.

बारणेंच्या पुढाकारामुळे विद्यार्थ्यांना ‘ग्लोबल’ संधी.. 

पिंपरी-चिंचवड शहरातील विद्यार्थ्यांसोबतच रोजगार आणि शिक्षणासाठी शहरात येणाऱ्या विद्यार्थ्यांनाही या उपक्रमाचा फायदा होणार आहे. विद्यार्थ्यांना केवळ परदेशी भाषेचे प्राथमिक ज्ञान देणे हा या योजनेचा उद्देश नसून, तांत्रिक कौशल्य + परदेशी भाषा + प्रमाणपत्र + रोजगार मार्गदर्शन या माध्यमातून त्यांना उद्योगाच्या गरजेनुसार तयार करणे, हा या निर्णयामागील व्यापक दृष्टिकोन आहे. विद्यार्थ्यांना भविष्यात परदेशात शिक्षण, रोजगार तसेच बहुराष्ट्रीय कंपन्यांमध्ये काम करण्याच्या संधी उपलब्ध व्हाव्यात आणि स्थानिक उद्योगांनाही प्रशिक्षित, बहुकौशल्यपूर्ण मनुष्यबळ मिळावे, यासाठी हा उपक्रम महत्त्वाचा मानला जात आहे. “आयटीआयच्या विद्यार्थ्यांना केवळ तांत्रिक शिक्षण देऊन थांबायचे नाही, तर त्यांना उद्योगाच्या बदलत्या गरजांनुसार रोजगारक्षम बनविणे आवश्यक आहे. जपानी आणि जर्मन भाषेचे प्रशिक्षण हे विद्यार्थ्यांच्या कौशल्यात महत्त्वाची भर घालणारे ठरेल. या माध्यमातून पिंपरी-चिंचवडमधून अधिकाधिक कुशल आणि जागतिक दर्जाचे मनुष्यबळ तयार व्हावे, हा या निर्णयामागील उद्देश आहे,” अशी भूमिका स्थायी समितीचे सभापती अभिषेक बारणे यांनी घेतली आहे. या उपक्रमामुळे महापालिकेच्या आयटीआयमध्ये शिकणाऱ्या विद्यार्थ्यांच्या कौशल्यांना जागतिक स्तरावर नवी दिशा मिळण्याबरोबरच ‘स्किल्ड पिंपरी-चिंचवड’ घडविण्याच्या प्रयत्नांनाही बळ मिळणार आहे.