सावरकर महिला मंडळाचा विंदा दर्शन कार्यक्रम संपन्न…

न्यूज पीसीएमसी नेटवर्क

पिंपरी (दि. २७ जुलै २०२३) :- स्वातंत्र्यवीर सावरकर मंडळ महिला विभागतर्फे ” विंदा दर्शन” हा कार्यक्रम मंगळवारी कॅप्टन कदम सभागृह येथे झाला. विंदांची सुकन्या जयश्री काळे यांनी विंदांच्या कवितांचे सादरीकरण केले. भारत मातेच्या प्रतिमा पूजनाने कार्यक्रमाची सुरुवात झाली.

जयश्री काळे यांनी सुप्रसिद्ध कवी “विंदा” म्हणजेच गोविंद विनायक करंदीकर यांनी लिहिलेल्या बाल-गीते, प्रेमगीते आणि स्त्री- जीवनावरील गीते तसेच इतर अनेक प्रकारच्या कविता सादर केल्या. त्यांनी सादर केलेल्या विंदांच्या बालवयातील “शेवटचा लाडू”, स्त्री-जीवनावर आधारित “झपताल”, मुंबईच्या धकाधकीच्या जीवनावर आधारित “तेच ते”, “चुकली दिशा तरी”, “घेता”, निवडणुकीवर आधारित “सब घोडे बारा टक्के” अशा एक ना अनेक प्रकारच्या कविता सादर केल्या. सर्व श्रोते मंत्रमुग्ध होऊन कवितांचा आस्वाद घेत होते. जयश्री काळे यांच्या कविता सादरीकरणाच्या शैलीने प्रेक्षकांची मने तृप्त झाली.

सावरकर मंडळ, महिला विभागाच्या लेखिका माधुरी वैद्य डिसोजा, विनीता श्रीखंडे,सुप्रियासोलांकुरे यांसह जवळपास ६०-६५ सभासद उपस्थित होत्या. कार्यक्रमाचे सूत्रसंचालन महिला विभागच्या सदस्या सौ. संपदा पटवर्धन यांनी केले. महिला विभागाच्या सदस्या शीतल गोखले यांनी जयश्री काळे यांचा परिचय करून दिला. महिला विभागाच्या कार्याध्यक्षा अश्विनी अनंतपुरे व सह कार्याध्यक्षा वैदेही पटवर्धन आणि अध्यक्षा नेहा साठे यांनी प्रमुख पाहुण्यांचा यथोचित सत्कार केला. महिला विभागाच्या सदस्या उन्नती वैद्य यांनी आभार प्रदर्शन केले.