चिखली परिसरात कुरिअरची ऑफिसं फोडणारी टोळी पोलीसांकडुन जेरबंद…

न्यूज पीसीएमसी नेटवर्क

पिंपरी (दि. १० जुलै २०२४) :- चिखलीतील मोरेवस्ती, रुपीनगर, चिखली या परिसरामध्ये मोठ्या प्रमाणात कामगार वर्ग राहण्यास आहेत. सध्याचा ऑनलाईन खरेदीचा ट्रेंड पाहता लोक मोठ्या प्रमाणात ऑनलाईन शॉपिंग करीत असतात. लोकांनी खरेदी केलेल्या वस्तुंचे पार्सल कुरियर कंपनीमार्फत ग्राहकांपर्यंत पोहचवले जातात.

अशाच एका शाडो फॅक्स टेक्नॉलॉजी प्रा.लि. या कुरियर कंपनीचे ऑफीस आंगणवाडी रोड, मोरेवस्ती चिखली पुणे या ठिकाणी आहे. (दि. ०१) रोजी रात्रौ १२.३० वाजता ते ०५.३० या दरम्यान कोणीतरी अज्ञात चोरटयांनी शाडो फॅक्स टेक्नॉलॉजी प्रा.लि. या कुरियर कंपनीचे शटर कशाचेतरी सहाय्याने उचकटुन त्यावाटे आत प्रवेश करुन कंपनीतील लोखंडी कपाटाचा दरवाजा तोडुन त्यामध्ये ठेवलेले गोदरेज कंपनीचे डिजीटल लॉकर त्यामध्ये ठेवलेल्या १,०७,२४४ रोख रक्कमेसह घरफोडी केली.

कंपनीच्या ऑफीसमध्ये ठिकठिकाणी सीसीटीव्ही कॅमेरे लावलेले असुन आपण पकडले जावु याची जाणीव झाल्याने आरोपींनी कंपनीतील सीसीटीव्ही फुटेज असलेले डी. व्ही. आर. मशीनदेखील चोरुन नेले. याबाबत फिर्यादी मन्नु रामबचन यादव यांनी दिलेल्या तक्रारी वरुन चिखली पोलीस स्टेशन येथे गुन्हा दाखल करण्यात आला. गुन्हयाचा तपास पोलीस उपनिरीक्षक लक्ष्मण मोगले यांच्याकडे देण्यात आला.

गुन्हयातील आरोपींना ओळखण्याचा महत्वाचा पुरावा म्हणजे सीसीटीव्ही कॅमे-यांचे डीव्हीआर मशीन चोरुन नेले असल्याने आरोपींची ओळख पटवुन त्यांना अटक करणे पोलीसांसमोर एक आव्हान होते. गुन्हयाचा तपास चालु असतानाच (दि. ०५ ते दि. ०६) रोजी सकाळी ०६.४५ वाजताचे दरम्यान कोणीतरी अज्ञात आरोपींनी डिलेवरी लिमीटेड कंपनी, टॉवरलाईन, सहयोगनगर, तळवडे पुणे या कुरियर कंपनीचे ऑफीसचे शटर उचकटुन लोखंडी कपाटाचा दरवाजा तोडुन कपाटातील १,०३,३८४ रुपये रोख रक्कम व ऑफीसमधील १५,८५८ रुपयांचे कुरियरचे पार्सल घरफोडी चोरी करुन चोरुन नेले. याबाबत फिर्यादी सचिन पांडुरंग जढर यांनी दिलेल्या तक्रारीवरून चिखली पोलीस स्टेशन येथे गुन्हा दाखल करण्यात आला. गुन्हयाचा तपास सहा. पोलीस निरीक्षक गणेश खारगे यांचेकडे देण्यात आला.

वरील दोन्ही गुन्हयातील आरोपींची गुन्हा करण्याची मोडस पाहीली असता दोन्ही गुन्हे एकाच आरोपींनी केले असण्याची शक्यता असल्याने चिखली पोलीस स्टेशनचे वरीष्ठ पोलीस निरीक्षक विठ्ठल साळुंखे यांनी तपास पथकाचे प्रभारी राजेश मासाळ, पोलीस उपनिरीक्षक व अंमलदार यांचे एक पथक स्थापन करुन त्यांना मार्गदर्शन करुन सुचना दिल्या. त्याप्रमाणे पोलीस उपनिरीक्षक राजेश मासाळ व पथकाने कौशल्यपुर्वक तपास करुन घटनास्थळाचे परीसरातील सर्व बाजुने येणा-या जाणा-या रस्तावरील सुमारे १०० सीसीटीव्ही कॅमे-यांचे फुटेजची तपासणी करुन आरोपींचा माग काढण्यात सदरची टीम यशस्वी झाली.

त्यांनी सदर गुन्हयामध्ये आरोपी १) आदर्श दयानंद मोरे वय २५ वर्षे, रा. विठ्ठलवाडी, देहुगाव पुणे, २) आनंद पोपट गादेकर वय ३४ वर्षे, राह. अवधुत सोसायटी, पिंगळे चौक, चिखली, पुणे ३) प्रदिप दिलीप तांबोळी वय २५ वर्षे रा.भाटेवस्ती, तळवडे गाव, पुणे यांना ताब्यात घेतले. त्यांना पोलीसी खाक्या दाखवताच त्यांनी वरीलप्रमाणे दोन्ही गुन्हे केले असल्याची कबुली दिली.

त्यांचेकडुन १) चिखली पोलीस स्टेशन गु. रजि. नंबर ३६८/२०२४, भारतीय न्याय संहिता २०२३ चे कलम ३३१(४), ३०५ (ए) या गुन्हयातील ५५,०००/-रुपये रोख रक्कम २) चिखली पोलीस स्टेशन गु. रजि. नंबर ३८५/२०२४, भारतीय न्याय संहिता २०२३ चे कलम ३३१ (३), ३३१ (४), ३०५ (ए) या गुन्हयातील ६४,०००/- रुपये रोख रक्कम ३) गुन्हा करण्यासाठी वापरलेली ३,००,०००/- रुपये किंमतीची वॅगनर कार नंबर एम.एच.१४. के.ए.८५३७, ४) गुन्हा करण्यासाठी वापरलेली २०,०००/- रुपये किंमीची पल्सर मोटारसायकल नंबर एम.एच.१४.सी.टी.०१३४ असा एकुण ४,३९,०००/- रुपये किंमतीचा मुद्देमाल हस्तगत करण्यात आला आहे.