जेवण देण्यास नकार दिल्याने ट्रक चालकाने ढाबाच उडवला…

न्यूज पीसीएमसी नेटवर्क

पिंपरी (दि. ०७ सप्टेंबर २०२४) :- हॉटेल मालकाने जेवण देण्यास नकार दिल्याच्या कारणावरून संतप्त झालेल्या एका ट्रक चालकाने मद्यधुंद अवस्थेत ट्रक थेट हॉटेलमध्ये घातल्याची घटना घडली आहे. यामध्ये संबंधित हॉटेलचे मोठ्या प्रमाणात नुकसान झाल्याची माहिती समोर येत आहे. इंदापूरमधील पुणे-सोलापूर या महामार्गावर हिंगणगावच्या परिसरात एका हॉटेलमध्ये हा प्रकार घडला.

एक ट्रक चालक रात्रीच्या वेळी जेवणासाठी थांबला. मात्र, हॉटेलच्या मालकाने हॉटेल बंद झाल्याचं कारण सांगत जेवण देण्यास नकार दिला. मात्र, याचाच राग ट्रक चालकाला आला आणि संतप्त झालेल्या ट्रक चालकाने रागाच्या भरामध्ये ट्रक थेट हॉटेलमध्ये घातला. या ठिकाणी उभ्या असलेल्या काही दुचाकी आणि चारचाकी वाहना ट्रकची धडक देत नुकसान केलं. यावेळी तेथे जमलेल्या लोकांनी या सर्व घटनेचा थरार मोबाईलमध्ये कैद केला. यानंतर या घटनेचा व्हिडीओ आता सोशल मीडियावर मोठ्या प्रमाणात व्हायरल होत आहे.

दरम्यान, सुदैवाने यामध्ये कोणतीही जीवितहानी झाली नाही. मात्र, हॉटेल आणि हॉटेलच्या बाहेर पार्क करण्यात आलेल्या वाहनांचे मोठ्या प्रमाणात नुकसान झाले आहे. या घटनेनंतर संबंधित ट्रक चालकाला पोलिसांच्या ताब्यात देण्यात आल्याचं सांगण्यात येत आहे. दरम्यान, हॉटेलच्या मालकाने जेवण नाकारल्यामुळे रागाच्या भरात ट्रक चालकाने हे कृत्य केल्याचं सागितलं जात आहे.