पिंपरीत भटक्या श्वानांवर विषप्रयोग..

• तीन दगावले; सहा श्वानांची प्रकृती गंभीर…

न्यूज पीसीएमसी नेटवर्क

पिंपरी (दि. १५ एप्रिल २०२५) :- पिंपरीतील एका सोसायटीच्या आवारात अज्ञातांनी १२ भटक्या श्वानांवर विषप्रयोग केला. यापैकी तीन श्वानांचा मृत्यू झाला, तर सहा श्वानांची प्रकृती गंभीर आहे. रविवारी (दि. १३) रात्री साडेदहा ते सोमवारी (दि. १४) सकाळी साडेआठ या दरम्यान हा प्रकार घडला.

प्रिया बाबूलाल गुगळे (४१, रा. महिंद्रा अॅथिया सोसायटी) यांनी सोमवारी संत तुकारामनगर पोलिस ठाण्यात फिर्याद दिली. अज्ञात व्यक्तीच्या विरोधात पोलिसांनी भारतीय न्याय संहिता कलम ३२५ अन्वये प्राण्यांना क्रूरतेने वागवण्यास प्रति करण्याबाबत अधिनियम १९६० चे कलम ११ (१) (सी) प्रमाणे गुन्हा दाखल केला.

महिंद्रा अँथिया ही उच्चभ्रू सोसायटी मानली जाते. तेथे भटक्या श्वानांना सोसायटीतील काहीजण खाद्यपदार्थ देतात. रविवारी रात्री साडेदहा ते सोमवारी सकाळी साडेआठ वाजताच्या दरम्यान अज्ञात व्यक्तीने १२ श्वानांना काहीतरी विषारी पदार्थ खाण्यास दिला. त्यामुळे तीन श्वानांचा मृत्यू झाला. इतर सहा श्वानांची प्रकृती चिंताजनक आहे.

श्वानप्रेमी व प्राणिमित्रांनी पोलिस ठाण्यात धाव घेतली. त्यानंतर पोलिसांनी गुन्हा दाखल करून घेतला. अधिक तपासानंतरच हा प्रकार कोणी केला हे स्पष्ट होईल, असे वरिष्ठ पोलिस निरीक्षक वनिता धुमाळ यांनी सांगितले.