प्रेमसंबंधाच्या संशयातून दोघांचे खून.. 

• एकाने गळफास घेऊन संपवले जीवन… 

न्यूज पीसीएमसी नेटवर्क

पिंपरी चिंचवड (दि. १४ ऑगस्ट २०२६) :- प्रेमसंबंधाच्या संशयातून दोन वेगवेगळ्या घटनांमध्ये खुनाच्या घटना घडल्याचे पोलिस नोंदीतून समोर आले आहे. मुळशी तालुक्यातील माणगाव येथे अज्ञात इसमाचा खून करण्यात आला असून, दुसऱ्या घटनेत मुलीच्या प्रेमसंबंधाची माहिती झाल्याने जावयाने मुलीचा गळा आवळून खून केल्याचा आणि त्यानंतर स्वतःही गळफास घेऊन आत्महत्या केल्याचा प्रकार कुरुळी येथे घडला.

माणगाव येथील एका डेव्हलपर्सच्या प्लॉटिंगमधील पत्र्याच्या शेडजवळ १३ ऑगस्ट रोजी सायंकाळी सातच्या सुमारास ३० ते ३५ वर्षे वयोगटातील एका अनोळखी पुरुषाचा मृतदेह आढळून आला. अज्ञात इसमाने त्याच्या हनुवटीवर व डोक्यात मारहाण करून त्याचा खून केल्याचे फिर्यादीत नमूद आहे. याप्रकरणी हिंजवडी पोलिस ठाण्यात गुन्हा दाखल करण्यात आला असून, आरोपीचा शोध सुरू आहे.

दरम्यान, कुरुळी येथे आणखी एक धक्कादायक घटना घडली. भाड्याच्या खोलीत राहणाऱ्या महिलेच्या मुलीचे आरोपीसोबत प्रेमसंबंध असल्याची माहिती झाल्याने आरोपीने तिचा गळा आवळून खून केला. त्यानंतर स्वतःही गळफास घेऊन आत्महत्या केल्याचे पोलिस नोंदीत नमूद आहे. या घटनेने परिसरात खळबळ उडाली आहे.

प्रेमसंबंध, संशय आणि कौटुंबिक वादातून दोन कुटुंबांवर आलेले हे संकट पुन्हा एकदा नात्यांमधील संवादाचा अभाव आणि संतापातून घेतले जाणारे टोकाचे निर्णय किती घातक ठरू शकतात, हे अधोरेखित करणारे आहे.