न्यूज पीसीएमसी नेटवर्क
पिंपरी (दि. २४ जून २०१९) :- शहरातील श्वान निर्बीजीकरणासाठी मागविलेल्या निविदेला संस्थांचा प्रतिसाद न मिळाल्याने हे काम करणा-या संस्थांना एका महिन्याची मुदतवाढ देण्यात आली आहे. त्यामुळे हे काम आता पुन्हा याच दोन संस्था करणार आहेत. यापूर्वी देखील याच संस्थांना तीन महिन्यांसाठी मुदतवाढ देण्यात आली होती. पिंपरी चिंचवड महापालिकेच्या पशूवैद्यकीय विभागाच्या वतीने शहरातील भटक्या कुत्र्यांच्या संख्येवर नियंत्रण ठेवण्यासाठी श्वानांच्या निर्बीजीकरणाची उपाययोजना केली जाते.
त्याकरिता उदगीर येथील मेसर्स सोसायरी फॉर दि प्रिव्हेन्शन क्रुएल्टी अँनिमल्स आणि नवी मुंबईतील मेसर्स अँनिमल असोसिएशन या दोन संस्थांना हे काम देण्यात आले आहे. मात्र, शहरातील भटक्या कुत्र्यांची संख्या पाहता एकुण चार संस्थांची नेमणूक करण्याची आवश्यक्ता आहे. या कामासाठी २७ नोव्हेंबर २०१८ रोजी निविदा प्रसिद्ध करण्यात आली होती. मात्र, या निविदा प्रक्रियेत फक्त तीन संस्थांनी अर्ज भरल्याने, त्यामध्ये स्पर्धा होऊ शकली नाही. त्यामुळे याच दोन संस्थांना १५ जानेवारी २०१८ पर्यंत मुदतवाढ देण्यात आली होती.
दरम्यान, चार संस्थांनी या निविदा प्रक्रियेत सहभाग घेतल्याने पहिले पाकिट उघडण्यात आले. मात्र, तांत्रिक तपासणीमध्ये फक्त एकच संस्था पात्र ठरली. त्यामुळे निविदा प्रक्रिया पुन्हा राबविणे गरजेचे आहे. ही बाब लक्षात घेऊन, या कामात खंड पडू नये, याकरिता याच दोन्ही संस्थांना हे काम करण्यासाठी मुदतवाढ देण्यात आली होती. ही दुसरी मुदतवाढ ४ जून, २०१९ रोजी संपुष्टात आली आहे. त्यामुळे निविदा प्रक्रिया पार पडेपर्यंत या दोन्ही संस्थांना दोन मुदतवाढ देण्याचा प्रस्ताव स्थायी समितीच्या मान्यतेकरिता ठेवण्यात आला आहे.
न्यूज पीसीएमसी Whatsapp Share करीता आपला मो.नं.रजिस्टर करा.