जीवनावश्यक वस्तू यापुढे पुरेशा प्रमाणात उपलब्ध होणार; साठ्याची आवश्यकता नाही – महापौर ढोरे…

न्यूज पीसीएमसी नेटवर्क

पिंपरी (दि. २६ मार्च २०२०) :- पिंपरी चिंचवड शहरातील कोरोना विषाणुच्या प्रादुर्भावामुळे घरात विलगीकरणात असणाऱ्या नागरिकांची संख्या १३०६ असून त्या सर्वांनी किमान १४ दिवसासाठी व आवश्यकता भासल्यास पुढील २८ दिवसांपर्यत घरातच थांबण्याच्या सूचनांचे पालन करावे. तसेच सुचनांचे पालन न करणाऱ्या होम कारंटाईनमधील नागरिकांवर कायद्यानुसार कारवाई करण्यात येणार असून सूचनांचे उल्लंघन करणाऱ्या नागरिकांना पोलिसांमार्फत ताब्यात घेवून पुढील १४ दिवसांपर्यत संस्थात्मक अलगीकरण ( कारंटाईनची ) व्यवस्था केलेल्या ठिकाणी राहावे लागेल. या आदेशाचे उल्लघन करणा-यांना कायद्यानुसार सहा महिन्यांपर्यंत शिक्षेची तरतुद असून नागरिकांनी सर्व सुचनांचे पालन करावे, असे आवाहन महापौर उषा उर्फ माई ढोरे व पक्ष नेते नामदेव ढाके यांनी केले आहे.

प्रधानमंत्री नरेंद्र मोदी यांनी दि. २५ / ०३ / २०२० पासून २१ दिवसापर्यंत भारतामध्ये लॉक डाऊन जाहीर केले असून या दरम्यान अन्नधान्य व जिवनावश्यक वस्तुंचा पुरवठा नियमितपणे होणार असल्याने नागरिकांनी घाबरुन जावू नये, असे आवाहन महापौर यांनी केले आहे. महानगरपालिका व पोलिस प्रशासन त्यासाठी आवश्यक उपाययोजना करत आहे. नागरिकांनी घरी, कामाच्या ठिकाणी अथवा वाहनामधील वातानुकुलीत यंत्रणेचा वापर टाळावा. तसेच शहरात कलम १४४ लागू झाले आहे. त्यामुळे शहरातील दुकाने व अस्थापना बंद ठेवण्यात येत असून अत्यंत आवश्यक असल्यासच नागरिकांनी घराबाहेर पडावे, असे आवाहन करण्यात येत आहे.

जीवनावशक वस्तू यापुढे पुरेशा प्रमाणात उपलब्ध होणार आहेत. त्यामुळे त्याचा अनावश्यक साठा करु नये, असे आवाहन ही महापौर माई ढोरे यांनी केले आहे. पिंपरी चिंचवड शहरातील कोरोना विषाणूचा प्रादुर्भाव रोखण्यासाठी सर्वांनी सहकार्य करावे, होम क्वारंटाईनमध्ये असणाऱ्या नागरिकांनी आपल्या कुटुंबीयासह आपल्या शरीराच्या तापमानाची तपासणी घरातच करावी व त्याची नोंद ठेवावी. महानगरपालिकेच्या तपासणी पथकाला माहिती देवून आवश्यक सहकार्य करावे, असे आवाहन ही त्यांनी केले आहे.

पिंपरी चिंचवड महानगरपालिकेच्या यशवंतराव चव्हाण स्मृती रुग्णालय व नविन भोसरी रुग्णालयामधुन आज दि. २८ / ०३ / २०२० पर्यंत एकुण १६९ व्यक्तींचे कोरोना ( कोविड १९ ) करीता घश्यातील द्रव्यांचे नमुने एनआयव्ही पुणे येथे तपासणी करीता पाठविण्यात आले आहेत. पैकी आज अखेर १२९ व्यक्तींचे अहवाल निगेटिव्ह आलेले आहेत. आज दि. २६ / ०३ / २०२० रोजी कोरोना ( कोविड १९ ) या आजाराच्या एकुण पॉझिटिव्ह रुग्णांची संख्या १२ आहे. सर्व रुग्णांची प्रकृती स्थिर असून त्यांचेवर महानगरपालिकेच्या यशवंतराव चव्हाण स्मृती रुग्णालय व नविन भोगरी रुग्णालयांमधील आयसोलेशन कक्षामध्ये उपचार सुरु आहेत.

तसेच आज दि. २६ / ०३ / २०२० रोजी एकुण २७ व्यक्तींना नविन भोसरी रुग्णालय व यशवंतराव चव्हाण स्मृती रुग्णालयामध्ये दाखल करण्यात आलेले असून त्यांचे कोरोना ( कोविड १९ ) करीता घश्यातील द्रव्याचे नमुने एनआयव्ही, पुणे येथे तपासणीकरीता पाठविण्यात आले आहेत. कोरोना संसर्गजन्य आजाराचा प्रादुर्भाव रोखण्यासाठी पिंपरी चिंचवड मनपामार्फत नियुक्त करण्यात आलेल्या २४ कर्मचारी यांची क्षेत्रीय सर्वेक्षण टिम घरोघरी जाऊन सर्वेक्षण करीत आहेत. आज दि . २६ / ०३ / २०२० अखेर शहरातील ४७३६९ नागरिकाचे सर्वेक्षण करण्यात आलेले असून पिंपरी चिंचवड मनपामध्ये आज अखेर १३०६ व्यक्तींना घरातील अलगीकरण कक्षात ठेवण्यात आलेले आहे. घरातील अलगीकरणात असणा-या नागरिकांनी बाहेर पडू नये. अशी व्यक्ती बाहेर पडल्याचे आढळल्यास त्याची माहिती महानगरपालिकेच्या सारथी हेल्पलाईन ८८८८००६६६६ यावर कळवावी असे आवाहन महापौर उषा उर्फ माई ढोरे व पक्ष नेते नामदेव ढाके यांनी केले आहे.

कोरोना आजाराचे संक्रमण थांबविण्यासाठी पिंपरी चिंचवड महानगरपालिकेचे वतीने सर्व नागरिकांना आवाहन करण्यात येते की अत्यावश्यक कारणाशिवाय घराच्या बाहेर पडु नये. तसेच फ्लूसारखी लक्षणे दिसून आल्यास नागरिकांनी तात्काळ वैद्यकीय तपासणी करुन घ्यावी. परदेश प्रवास करुन चीन, डेमोक्रेटिक रिपब्लीक ऑफ कोरिया, फ्रान्स, जर्मनी, स्पेन, इटली, इरान, दुबई, सौदी अरेबिया, युनायटेड स्टेट्स ऑफ अमेरिका, कतार, ओमान, कुवेत आणि युनाटेड अरब अमिरात या देशांमधुन आलेल्या सर्व नागरिकांनी किमान १४ दिवस स्वतःहून घरामध्येच ( Home Quarantine ) मध्ये रहावे व जे नागरिक घरामध्ये ( Home Quarantine ) राहणार नाहीत अशा नागरिकांचे संस्थात्मक अलगीकरण करण्यात येवुन त्यांच्यावर कायदेशीर कारवाई करण्यात येईल. तसेच उपरोक्त नमूद देशांमधून प्रवास करुन आलेल्या नागरिकांनी याबाबतची माहिती आपल्या घराजवळील महापालिकेच्या दवाखाना किंवा रुग्णालयात तातडीने द्यावी.

पिंपरी चिंचवड महापालिकेच्या वतीने आवाहन करण्यात येत आहे. पिं. चिं. मनपामार्फत हेल्प लाईन कार्यान्वित करण्यात आलेली आहे. सदर हेल्पलाईन क्रमांक ८८८८००६६६६ हा आहे. तसेच ९९२२५०१४५० हा Whatsapp क्रमांक कार्यान्वित करण्यात आलेला आहे. राज्य शासनामार्फत कार्यान्वित idsp . mkcl . org या संकेतस्थळावर संशयित कोरोना रुग्ण संबंधित माहिती देण्याचे आवाहन नागरीक तथा सर्व वैद्यकीय व्यावसायिक यांना करण्यात येत आहे.