कोविड रुग्णांसाठी पालिकेच्या रुग्णालयात रेमडेसिव्हीर इंजेक्शन व औषधे मोफत..

न्यूज पीसीएमसी नेटवर्क

पिंपरी (दि. २०. मार्च २०२१) :- पिंपरी चिंचवड महापालिकेच्या रुग्णालयांमध्ये उपचार घेणाऱ्या कोविड-१९ रुग्णांसाठी रेमडेसिव्हीर इंजेक्शन व औषधे मोफत दिली जाणार आहेत, अशी माहिती महापौर उषा ढोरे व सत्तारूढ पक्षनेते नामदेव ढाके यांनी दिली.

महापालिका आयुक्त राजेश पाटील यांनी पदाधिकाऱ्यांशी चर्चा करून हा निर्णय घेतला असल्याचेही महापौर व पक्षनेते यांनी सांगितले. राज्यातील शासकीय रुग्णालयामध्ये रेमडेसिव्हर इंजेक्शन मोफत उपलब्ध आहे. महापालिकेच्या रुग्णालयामध्ये उपचार घेणाऱ्या रुग्णांना हे औषध त्वरित मिळावे.

तसेच डॉक्टरांनी हे इंजेक्शन लिहून दिल्यानंतर ते प्राप्त करून घेताना रुग्णांची / नातवाईकांची धावपळ होते. औषधांची किंमत जास्त असल्यामुळे जास्त रक्कम खर्च होते. या पार्श्वभूमीवर पिंपरी-चिंचवड महापालिकेच्या रुग्णालयात उपचार घेणाऱ्या कोविड -19 रुग्णांना वेळेत इंजेक्शन मिळण्यासाठी हा निर्णय घेण्यात आला आहे.