जैन युवाचार्य महेंद्रऋषीजी यांचे चिंचवडमध्ये स्वागत…

न्यूज पीसीएमसी नेटवर्क

पिंपरी (दि. १९ जुलै २०२१) :-  वर्धमान स्थानकवासी जैन श्रावक संघ व कल्याण प्रतिष्ठान यांच्या वतीने जैन युवाचार्य महेंद्रऋषीजी म. सा., हितेंद्रऋषीजी म. सा. तसेच उपप्रवर्तिनी साध्वीरत्ना प. पू. सन्मतीजी म. सा. आदी ठाणा पाच यांचा चातुर्मासानिमित्त चिंचवडगाव येथील कल्याण प्रतिष्ठानमध्ये मोठ्या उत्साहात मंगल प्रवेश झाला.

श्रीधरनगर येथील संघाचे कार्याध्यक्ष राजेंद्र जैन यांच्या निवासस्थानी सकाळी भक्तीमय जाप करण्यात आला. आठ वाजता तानाजीनगर मार्गे गुरू महाराज केशवनगरकडे मार्गस्थ झाले. जैन समाज बाधवांनी शासनाच्या करोनाविषयक नियमांचे पालन करून त्यांचे स्वागत केले. विविध पारंपरिक वेशभूषा करून अनेकांनी जैन धर्मगुरूचा जागोजागी जयघोष केला. वीर विशाल संघ चातुर्मास कमिटी आणि महिला मंडळाने विशेष योगदान दिले. प्रवेश झाल्यावर गुरू भगवंतांनी महामांगलिक मंत्र पठण केले.

संघाचे अध्यक्ष अशोक बागमार, माजी अध्यक्ष दिलीप नहार व कल्याण प्रतिष्ठाणचे अध्यक्ष सुरेश सेठिया, जैन कॉन्फरन्सचे राष्ट्रीय अध्यक्ष पारस मोदी, राजेश साकला, प्रा. अशोक पगारिया, सुरेश गादिया, रुचिरा सुराणा आदी मान्यवर उपस्थित होते. संघाच्या वतीने चातुर्मास अध्यक्ष म्हणून राजेश साकला यांची नियुक्ती करण्यात आली .

चातुर्मास कार्यकाळाला विशेष महत्त्व आहे. यानिमित्त तप, साधना व प्रवचन या माध्यमातून विविध कार्यक्रम आयोजित केले आहेत. या कार्यकाळात जास्तीत जास्त धार्मिक विधी व सामाजिक उपक्रमात सहभागी होण्याचे आवाहन संघाच्या वतीने करण्यात आले आहे. कार्यक्रमाचे सूत्रसंचालन उपाध्यक्ष संतोष धोका प्रास्ताविक अध्यक्ष अशोक बागमार, गुरू महाराजांचा परिचय प्रसिद्धीप्रमुख मनोज बाफना यांनी दिला. सचिव नंदकुमार लुनावत यांनी आभार मानले.