चॅलेंजर पब्लिक स्कूलच्या ध्रुव सपलिगा याला आंतरराष्ट्रीय गणित ऑलिंपियाडमध्ये सुवर्ण पदक!…

• IMO परीक्षेत जागतिक स्तरावर ७२ वा क्रमांक, महाराष्ट्र झोनमध्ये प्रथम; शाळेचा आणि राज्याचा राखला अभिमान…

न्यूज पीसीएमसी नेटवर्क

पिंपळे सौदागर (दि. २२ जुलै २०२५) :- चॅलेंजर पब्लिक स्कूलमधील बारावीचा विद्यार्थी ध्रुव सपलिगा याने SOF Olympiad-IMO (International Mathematics Olympiad) या आंतरराष्ट्रीय परीक्षेत सुवर्ण पदक पटकावत भव्य यश संपादन केले आहे. आंतरराष्ट्रीय स्तरावर ध्रुवने ७२ वा क्रमांक मिळवला असून, महाराष्ट्र झोनमध्ये प्रथम क्रमांक मिळवत शाळेचा व राज्याचा नावलौकिक वाढवला आहे.

IMO ही परीक्षा संपूर्ण देशभरातील व ७२ देशांमधील विद्यार्थ्यांच्या गणित विषयातील प्रावीण्य व बुद्धिमत्ता तपासण्यासाठी घेतली जाते. यावर्षी ९६,४९९ शाळांमधून कोट्यवधी विद्यार्थ्यांनी ही परीक्षा दिली होती. अशा स्पर्धेतून ध्रुवने स्वतःचा ठसा उमटवत SOF – IMO झोनल गोल्ड मेडल, ५००० रुपयांचे रोख पारितोषिक आणि झोनल एक्सलन्सचे प्रमाणपत्र प्राप्त केले आहे.

ध्रुवच्या या अपूर्व यशाबद्दल शाळेचे संचालक संदीप काटे सर यांनी त्याचा व पालकांचा पुष्पगुच्छ व बक्षीस देऊन सत्कार केला. मुख्याध्यापिका सुविधा महाले, ज्युनिअर कॉलेज विभाग प्रमुख शर्वरी कट्टी तसेच सर्व शिक्षकांनी ध्रुवचे अभिनंदन करत त्याच्या उज्ज्वल भविष्यासाठी शुभेच्छा दिल्या.

ध्रुवने आपल्या भाषणात या यशाचे श्रेय शिक्षकांचे मार्गदर्शन व पालकांच्या पाठिंब्याला दिले. त्याच्या अभ्यासू वृत्ती, जिद्द आणि आत्मविश्वासामुळे हे यश शक्य झाल्याचेही तो म्हणाला.