पिंपरी-चिंचवडमध्ये नाट्य संकुल होणार..

• उपमुख्यमंत्री अजित पवारांची घोषणा…

न्यूज पीसीएमसी नेटवर्क

चिंचवड (दि. २५ ऑगस्ट २०२५) :- पिंपरी-चिंचवड शहरात लवकरच नाट्य संकुल उभारण्यात येणार असल्याची घोषणा राज्याचे उपमुख्यमंत्री अजित पवार यांनी केली. अखिल भारतीय मराठी नाट्य परिषद, पिंपरी-चिंचवड शाखेच्या २९ व्या वर्धापन दिनानिमित्त प्रा. रामकृष्ण मोरे नाट्यगृहात झालेल्या पुरस्कार सोहळ्यात ते बोलत होते.

पवार म्हणाले, “शहराचा केवळ औद्योगिक नव्हे तर सांस्कृतिक विकासही व्हावा यासाठी नाट्य संकुल आवश्यक आहे. भाऊसाहेब भोईर यांनी यासाठी मागणी केली असून मी महापालिका आयुक्तांना याबाबत जागा उपलब्ध करून देण्याचे निर्देश देतो.”

कार्यक्रमात अखिल भारतीय मराठी नाट्य परिषद, मुंबईचे विश्वस्त अशोक हांडे प्रमुख पाहुणे होते. उपमुख्यमंत्री अजित पवार यांचा मध्यवर्ती शाखेतर्फे विशेष सत्कार करण्यात आला.

यावेळी विविध पुरस्कार जाहीर करण्यात आले. ‘कै. बालगंधर्व पुरस्कार’ ज्येष्ठ नाट्यसंगीतकार ज्ञानेश पेंढारकर, ‘आचार्य अत्रे पुरस्कार’ संकर्षण कऱ्हाडे, ‘कै. अरुण सरनाईक पुरस्कार’ प्रवीण तरडे, ‘कै. स्मिता पाटील पुरस्कार’ स्पृहा जोशी, ‘कै. जयवंत दळवी पुरस्कार’ अरविंद जगताप यांना देण्यात आला. तर ज्येष्ठ शास्त्रीय गायक पं. सुरेश साखवळकर यांना ‘जीवन गौरव पुरस्कार’ मिळाला.

विशेष सन्मान सुवर्णा काळे, रति देशमुख, संदीप जम्माड देशमुख, संदीप बबलू जगदाळे, सोमनाथ तरटे व राष्ट्रीय खेळाडू प्रांजल जाधव यांना मिळाला. राज्य नाट्यस्पर्धा २०२४ मधील विजेत्यांचाही गौरव करण्यात आला.