महावितरण-लघुउद्योग संघटनेची आढावा बैठक.. 

• वीजपुरवठा सुधारणा व सबस्टेशन प्रकल्पांना गती.. 
• उद्योजकांच्या समस्यांवर दर महिन्याच्या दुसऱ्या मंगळवारी बैठकीचे आश्वासन… 

न्यूज पीसीएमसी नेटवर्क

पिंपरी (दि. २८ सप्टेंबर २०२५) :- भोसरी येथील महावितरण कार्यालयात पिंपरी-चिंचवड लघुउद्योग संघटनेचे पदाधिकारी व महावितरणचे वरिष्ठ अधिकारी यांच्या उपस्थितीत मासिक आढावा बैठक पार पडली. या बैठकीत वीजपुरवठ्याशी संबंधित अनेक तातडीच्या प्रश्नांवर चर्चा होऊन उपाययोजना ठरविण्यात आल्या.

बैठकीस संघटनेचे अध्यक्ष संदीप बेलसरे, सचिव जयंत कड, संचालक नवनाथ वायाळ, सचिन आदक, मा. नगरसेवक संजय वाबळे, तसेच महावितरणचे मुख्य अभियंता सिंहाजीराव गायकवाड, कार्यकारी अभियंता अतुल देवकर, सहाय्यक अभियंता माने, जाधव व भगत उपस्थित होते.

मुख्य अभियंता गायकवाड यांनी माहिती दिली की, कॅनबे चौक, तळवडे येथे होणाऱ्या नव्या सबस्टेशनसाठी अॅप्रूव्हल मिळाल्यानंतर लवकरच कामाला सुरुवात होणार आहे. औद्योगिक परिसरातील गरजेनुसार जुन्या केबल बदलण्याची कामे सुरू आहेत. तसेच भोसरीतील सेक्टर ७ आणि १० मधील फॅसिलिटी सेंटर परिसरातून प्रत्येकी १००० चौ. मी. जागा सबस्टेशनसाठी पी.एम.आर.डी.एकडून घेण्यास मान्यता मिळाली आहे.

भोसरी शांतीनगर येथे नाल्याच्या शेजारी २०० क्षमतेचे दोन ट्रान्सफॉर्मर बसविण्याचे निर्देश देण्यात आले. याशिवाय तळवडे, ज्योतिबानगर, सोनवणे वस्ती व शेलारवस्ती येथे जागा उपलब्ध झाल्यास तिथेही प्रकल्प राबविण्याचा विचार केला जाईल. यावेळी विजेचे साहित्य वेळेवर उपलब्ध करून देण्याचे, झाडांच्या फांद्या वेळेवर छाटण्याचे, डी.पी. बॉक्सची झाकणे नसल्यास नवी झाकणे बसविण्याचे आश्वासन अधिकाऱ्यांनी दिले.

बैठकीचा समारोप करताना गायकवाड यांनी उद्योजक व महावितरण यांच्यातील समन्वयासाठी दर महिन्याच्या दुसऱ्या मंगळवारी अशाच आढावा बैठका नियमितपणे घेण्यात येतील, असे सांगितले.