वाकडमध्ये २५ लाख लिटर क्षमतेची पाण्याची टाकी कार्यान्वित

• कावेरीनगर परिसरातील टाकीचे आ. शंकर जगताप यांच्या हस्ते उद्घाटन…

न्यूज पीसीएमसी नेटवर्क

पिंपरी (दि. २१ नोव्हेंबर २०२५) :- पिंपरी चिंचवड महापालिकेच्या पाणीपुरवठा विभागाच्या वतीने वाकड परिसरातील कावेरीनगर येथे उभारण्यात आलेल्या २५ लाख लिटर क्षमतेच्या पाण्याच्या उंच टाकीचे उद्घाटन आज आमदार शंकर जगताप यांच्या हस्ते झाले. या टाकीतून पाणीपुरवठा देखील सुरू करण्यात आला असून वाकड परिसरातील कस्पटेवस्ती, पिंक सिटी रस्ता परिसर, वेणूनगर, कावेरीनगर, पोलीस कॉलनी, दत्त मंदिर रस्ता आदी परिसरातील नागरिकांना आता सुरळीत पाणीपुरवठा होणार असल्याचे आमदार जगताप यांनी सांगितले.

वॉर्ड क्र. ५३, स. नं. २०८ येथे तब्बल ५ कोटी ८५ लाख रुपयांच्या खर्चातून ही टाकी व संपवेल उभारण्यात आली आहे. उद्घाटन सोहळ्याला अतिरिक्त आयुक्त विजयकुमार खोराटे, माजी स्थायी समिती सभापती ममता गायकवाड, माजी नगरसदस्य विनायक गायकवाड, संदीप कस्पटे, आरती चौंधे, मुख्य अभियंता प्रमोद ओंभासे, सह शहर अभियंता अजय सूर्यवंशी, अनिल भालसाखळे, क्षेत्रीय अधिकारी आश्विनी भोसले, कार्यकारी अभियंता महेश बरिदे, महेश कावळे, हेमंत देसाई, जनता संपर्क अधिकारी प्रफुल्ल पुराणिक, उपअभियंता प्रविण धुमाळ यांच्यासह नागरिक उपस्थित होते.

महापालिकेने उभारलेली ही टाकी उच्च दर्जाची असून शहरातील वाढत्या लोकसंख्येचा विचार करून पुरेशा पाणीपुरवठ्यासाठी सातत्याने प्रयत्न केले जात असल्याचे आमदार जगताप म्हणाले. शहराची लोकसंख्या जवळपास ३५ लाखांपर्यंत गेली असून आगामी काळातील पाणीपुरवठा सुरळीत ठेवण्यासाठी राज्य सरकारचे सहकार्य मिळवण्याचा प्रयत्न राहील, असेही त्यांनी नमूद केले.

“शहरातील प्रत्येक नागरिकाला मुबलक व नियमित पाणीपुरवठा मिळणे अत्यावश्यक आहे. वाकड परिसरात उभ्या राहिलेल्या २५ लाख लिटर क्षमतेच्या टाकीमुळे मोठ्या प्रमाणात दिलासा मिळणार आहे. पाणीपुरवठा विभाग सातत्याने आवश्यक प्रकल्प राबवत आहे.”
— विजयकुमार खोराटे, अतिरिक्त आयुक्त

नवीन पंप हाऊसची उभारणी…

कावेरीनगर परिसरातील नव्या टाकीला नियमित पाणी भरता यावे यासाठी महापालिकेच्या विद्युत विभागाने स्वतंत्र पंप हाऊस उभारले आहे. ५० एचपी क्षमतेचे २ वर्किंग व १ स्टँडबाय असे तीन पंप बसवण्यात आले असून संपूर्ण टाकी केवळ ६ तासांत भरते. या पंप हाऊससाठी २०० केव्हीए स्वतंत्र वीज भार मंजूर करण्यात आला आहे. यासाठी स्वतंत्र रोहित्र संच व उच्च दाब नियंत्रणासाठी २ आरएमयू बसवण्यात आले असल्याची माहिती अनिल भालसाखळे, सह शहर अभियंता (विद्युत) यांनी दिली.

कार्यक्रमाचे प्रास्ताविक प्रविण धुमाळ यांनी केले. सूत्रसंचालन प्रफुल्ल पुराणिक यांनी केले तर मुख्य अभियंता प्रमोद ओंभासे यांनी आभार प्रकट केले.