नागरिकांनो मास्क वापरा… हवेतून होतेय करोनाच्या विषाणूची बाधा…

• जागतिक आरोग्य संघटनेकडून अधिकृत दुजोरा…

न्यूज पीसीएमसी नेटवर्क

पिंपरी (दि. १० जुलै. २०२०) :- हवेतून करोनाच्या विषाणूची बाधा होऊ शकते अशी भीती ३२ देशांमधल्या २३९ शास्त्रज्ञांनी तीन दिवसांपूर्वी व्यक्त केली होती. चिंतेची बाब म्हणजे जागतिक आरोग्य संघटनेनेही (वर्ल्ड हेल्थ ऑर्गनायझेशन किंवा WHO) यावर शिक्कामोर्तब केले आहे. संघटनेने गुरुवारी प्रसिद्ध केलेल्या अहवालामध्ये बंदिस्त जागांमध्ये गर्दीच्या ठिकाणी हवेच्या माध्यमातून करोना पसरण्याची शक्यता नाकारता येत नाही असे स्पष्टपणे नमूद केले आहे.

अनेक घटनांचा अभ्यास केल्यानंतर WHO नं नमूद केलं आहे की, “काही ठिकाणचा करोनाचा उद्रेक बघता, बंदिस्त जागी गर्दी होत असेल तर हवेद्वारे अर्थातच ड्रॉपलेट्सच्या सोबतीनं करोनाचा प्रसार होण्याची शक्यता नाकारता येत नाही.” रेस्टॉरंट्स, फिटनेस सेंटर्स, समूहगानासारख्या जागा अशा घटनांमध्ये असा प्रसार झाल्याचं दिसून आल्याचं संघटनेनं म्हटलं आहे.

बंदिस्त जागा, जिथं हवा पुरेशी खेळती नसते आणि अशा ठिकाणी गर्दी असेल व बराच काळासाठी करोनाबाधित व्यक्ती तिथं असेल तर हवेमधूनही इतरांना संसर्ग होण्याची शक्यता नाकारता येत नाही असं WHO नं नमूद केलं आहे.अर्थात, केवळ व केवळ हवेमार्गे करोनाचा प्रसार अशा स्थितीत होणं कठीण आहे आणि हवेमार्गे व ड्रॉपलेटच्या माध्यमातून असा दोन्ही मार्गे प्रसार होण्याची शक्यता व्यक्त करण्यात आली आहे.