भोसरीत पूर्वीच्या भांडणातून एकावर चॉपर, फायटरने वार..

• इतरांवर देखील टोळीकडून हल्ला; तिघे गजाआड…

न्यूज पीसीएमसी नेटवर्क

पिंपरी (दि. ०६ मार्च २०२१) :- पूर्वी झालेली भांडण मिटविण्यासाठी आरोपीने एकाला बोलावून घेतले. त्यावेळी त्याच्यासोबत फिर्यादीसह तिघेजण गेले होते. पूर्वीच्या भांडणाचा राग मनात धरून आरोपीने आकाश खरात याला कोयते, पिस्तूल सारखे हत्यार, चॉपर, फायटरने मारून वार करून गंभीर जखमी करून जीवे मारण्याचा प्रयत्न केला.

तसेच सागर प्रधान, घनशाम यादव, शुशांत जाधव यांना कोयता व चाॅपरने वार करून जखमी केले. कोयत्याने वार करून फिर्यादी अक्षय रणदिवे यांना जीवे मारण्याची धमकी दिली. दहशत माजवण्याच्या उद्देशाने पिस्तूलसारख्या हत्यारातून फाटफाट आवाज करत कोयते, चाकू चारचाकी वाहनाच्या बाहेर काढून हवेत फिरवून पळून गेले. नेहरूनगर येथे गुरुवारी (दि. ४) सायंकाळी साडेसातच्या सुमारास हा प्रकार घडला.

अक्षय अण्णा रणदिवे (वय २६, रा. खंडे वस्ती, एमआयडीसी भोसरी) यांनी या प्रकरणी एमआयडीसी भोसरी पोलीस ठाण्यात फिर्याद दिली आहे. सुरज जैसवाल, रोहित भालेराव, रॉबिन सिंग (तिघे रा. नेहरू नगर, पिंपरी) अशी अटक केलेल्या आरोपींची नावे आहेत. त्यांच्यासह किरण जैसवाल, रोहित कसबे (दोन्ही रा. नेहरू नगर, पिंपरी), अरविंद शेलार, आदनान तसेच डायमंड (पूर्ण नाव माहीत नाही) यांच्या विरोधात गुन्हा दाखल करण्यात आला आहे.